Վթար Կոտայքի մարզում. վիրավորներից մեկի վիճակը ծայրահեղ ծանր է, երկուսինը` ծանր

Հոկտեմբերի 7-ին` ժամը 20.02-ին, ահազանգ է ստացվել, որ Կոտայքի մարզի Աբովյան քաղաքի կամրջի մոտակայքում տեղի է ունեցել ՃՏՊ, կան տուժածներ. անհրաժեշտ է փրկարարների օգնությունը:

Դեպքի վայր է մեկնել մեկ մարտական հաշվարկ:

Պարզվել է, որ դեռևս չբացահայտված հանգամանքներում բախվել են «ԳԱԶ 31-10» մակնիշի 15 SS 255 (վարորդ` 1976 թ. ծնված Ա. Մ.) և «ԳԱԶ-52» մակնիշի 19 FL 947 պետհամարանիշերով ավտոմեքենաները (վարորդ՝ 1976 թ. ծնված Գ. Գ.):

Մինչ հրշեջ-փրկարարների կանչի վայր հասնելը` Ա., Կ. (ծնված 1968 թ.) և Ս. (ծնված 1952 թ.) Մ.-ները հոսպիտալացվել են «Սուրբ Գրիգոր Լուսավորիչ» ԲԿ:

Հրշեջ-փրկարարները «ԳԱԶ 31-10» մակնիշի ավտոմեքենան դուրս են բերել ճանապարհի երթևեկելի հատված, կատարել ճանապարհի լվացման աշխատանքներ, դադարեցրել գազի արտահոսքը և հոսանքազրկել ավտոմեքենաները:

Բժիշկները Ա. Մ.-ի առողջական վիճակը գնահատել են ծայրահեղ ծանր, իսկ Կ. և Ս.Մ.-ների առողջական վիճակը' ծանր: