«Եռյակն ամբողջական իշխանափոխության է ձգտում». Ռուբեն Հակոբյան

Այսօր՝ հոկտեմբերի 8-ին, Գյումրիում կազմակերպվել էր Եռյակի մարզային իրազեկման հանրահավաքը, որի ժամանակ ելույթ ունեցավ «Ժառանգություն» խմբակցության ղեկավար Ռուբեն Հակոբյանը, ով իր ելույթում, դիմելով գյումրեցիներին, ասաց, որ ոչ թե եկել են իրենց «դուխ տալու», այլ՝ «դուխ վերցնելու»:

«Այս երեք քաղաքական ուժերին միավորել է մեկ քաղաքական օրակարգ` ամբողջական իշխանափություն: Վստահ եմ՝ մեկ անձով հարց չի լուծվի. երբ ասում ենք՝ «ամբողջական իշխանափոխություն» ի նկատի ունենք և’ նախագահ, և’ կառավարություն, և’ Ազգային ժողով, ու դրա հետ միասին՝ ամբողջ համակարգի փոփոխություն, որտեղից այսօրվա կաշառակերները, այսօրվա չինովնիկը պետք է հեռանան: Նրանք ոչ թե պետք է հեռանան Հայաստանից, այլ պետք է դաստիարակել նրանց»,- ասաց պատգամավորը:

Ռուբեն Հակոբյանի խոսքով` իրենք ունեն ամբողջական իշխանափոխության օրակարգ: Եթե ժողովուրդը համաձայն է այդ օրակարգի հետ, պետք է գա Ազատության հրապարակ: