Փարիզում եռակողմ հանդիպման նպատակն է հասնել խաղաղության ԼՂ հակամարտության հարցում

Ֆրանսիայում հոկտեմբերի վերջին կայանալիք Սերժ Սարգսյան-Իլհամ Ալիև հանդիպման հետ մեծագույն հույսեր են կապում ինչպես Փարիզում, այնպես էլ Բեռլինում: Հայաստանում Ֆրանսիայի դեսպան Անրի Ռենոն շեշտում է, որ այս հանդիպումը նախաձեռնելիս Ֆրանսիան հույս ունի հասնել խաղաղության ԼՂ հակամարտության հարցում: «Տարածաշրջան այցելության ժամանակ Երևանում և Բաքվում Ֆրանսիայի նախագահ Ֆրանսուա Օլանդն ասաց, որ պետք է խթանել երկխոսությանը' միաժամանակ պատկերացնելու և նախատեսելու այն գործիքները, որ կարող են վստահություն առաջացնել երկու երկրների միջև' նպատակ ունենալով երաշխավորելու զինադադարի պահպանումն ու բացառել զինվորականների և քաղաքացիների մահերը: Պետք է երկարաժամկետ լուծում տալ հարցին և հիմնվել այն սկզբունքների վրա, որոնք առաջարկել են ԵԱՀԿ ՄԽ համանախագահները: Հակամարտությունը պետք է լուծել երեք հայտնի սկզբունքների հիման վրա և հենց այդ սկզբունքների հիման վրա հակամարտության կարգավորումը Փարիզում կայանալիք հանդիպման գլխավոր առարկան է»,- «Արմենպրես»-ի փոխանցմամբ' ասաց Անրի Ռենոն:

«Եթե ուզում ես առաջընթաց ունենալ, պետք է պարբերաբար հանդիպել: Խիստ կարևոր է, որ Փարիզն է նախաձեռնել հաջորդ հանդիպումը: Մեծ հույսեր ենք կապում Փարիզում կայանալիք հանդիպման հետ, քանի որ առանց որոշում կայացնողների միջև հանդիպումների' իրավիճակում փոփոխություն չի կարող լինել»,- ասաց Հայաստանում Գերմանիայի դեսպան Ռայներ Մորելը:

Հոկտեմբերի վերջին Փարիզում նախատեսվում է Հայաստանի և Ադրբեջանի նախագահների հանդիպումը: Հանդիպումը կկայանա Ֆրանսիայի նախագահ Ֆրանսուա Օլանդի նախաձեռնությամբ: Մայիսին վերջին տարածաշրջան այցելության ժամանակ Ֆրանսուա Օլանդը Երևանում և Բաքվում Փարիզում հանդիպման կոչ արեց' հույս հայտնելով, որ հանդիպումը նոր խթան կհանդիսանա հակամարտությունը խաղաղ ճանապարհով լուծելու համար: