Մոնսերատ Կաբալյեն կրկին Արցախում է

Իսպանացի հանրահայտ օպերային երգչուհի կրկին այցելել է Արցախ: «Արմենպրես»-ի հաղորդմամբ՝ նա հոկտեմբերի 13-ին հյուրընկալվել է Ստեփանակերտի երաժշտական քոլեջում: Այս այցի ընթացքում աշխարհահռչակ երգչուհու հետ նաև նրա թոռնուհին է, ում հետ քոլեջում դաշնամուր են նվագել:

Կաբալյեն Արցախ էր այցելել նաև 2013թ. հունիսի սկզբին՝ չընկրկելով նույնիսկ Ադրբեջանի ղեկավարության հիստերիկ ջղաձգություններից ու Իսպանիայի ԱԳՆ հղվող նոտաներից: Կաբալյեն հունիսի 5-ին այցելել է Գանձասար և Շուշի, ծանոթացել միջնադարյան հայկական եկեղեցական ճարտարապետական արվեստին: Երգչուհին չի թաքցրել իր հիացմունքը, և ԼՂՀ նկատմամբ իր հետաքրքրությունը բացատրել է հայկական քրիստոնեական հուշարձանների առատությամբ: «Ես այստեղ եմ որպես երգչուհի: Բացի դրանից, ես ներկայացնում եմ Միավորված ազգերի կազմակերպությունը: Առաջարկում եմ ձեզ իմ ձեռք ն ու սիրտը,- ասել է երգչուհին Ստեփանակերտում, - այս երկիրը ոչ միայն քրիստոնեության կղզի է, այլև քրիստոնեության պատմության արմատը: Ես քրիստոնյա եմ ոտքից մինչև գլուխ»: Նա հունիսի 6-ին համերգ էր ունեցել Ստեփանակերտում, իսկ դեկտեմբերի 12-ին Փարիզում տեղի է ունեցել Մոնսերատ Կաբալյեի «Հայաստան և Արցախ. քրիստոնեության կղզյակ» ալբոմի շնորհանդեսը:

Կաբալյեն բազմաթիվ հեղինակավոր մրցանակների դափնեկիր է, ակտիվորեն զբաղվում է նաև բարեգործությամբ։ Օպերային աստղը ՄԱԿ-ի պատվավոր դեսպան է և ՅՈՒՆԵՍԿՕ-ի բարի կամքի դեսպան: