Կառավարության 3-րդ մասնաշենքի աստիճանները բեմի վերածվեցին դանիական երգչախմբի համար

Դանիայի Հասլև քաղաքի եկեղեցու երիտասարդական երգչախումբը, որի երգացանկում տեղ է գտնում նաև հայ հոգևոր երաժշտությունը, հոկտեմբերի 14-ին Ծիծեռնակաբերդում կնկարահանվի Եղեռնի 100-րդ տարելիցին նվիրված տեսահոլովակում: Այս մասին հոկտեմբերի 14-ին երգչախմբի հետ հանդիպման ընթացքում լրագրողներին տեղեկացրեց ՀՀ մշակույթի նախարարի տեղակալ Արթուր Պողոսյանը:

«Բարձր եմ գնահատում Դանիայի տարբեր եկեղեցիներում հաջորդ տարի ելույթներով հանդես գալու և Հայոց ցեղասպանության մասին ձայն բարձրացնելու ձեր ծրագիրը: Սա սև էջ է հայոց պատմության մեջ, որի մասին պետք է բարձրաձայնել», - նշեց Արթուր Պողոսյանը:

Հասլև քաղաքի եկեղեցու երիտասարդական երգչախումբը Հայաստանում է գտնվում ՀՀ մշակույթի, Դանիայում ՀՀ դեսպանության և Տավուշի թեմի աջակցությամբ: Հայաստան այցի ընթացքում երգչախումբը ելույթ է ունեցել Տավուշի, Կոտայքի, Սյունիքի մարզերում, ինչպես նաև Նանսենի նորաստեղծ թանգարանի հանդիսավոր բացմանը:

Ասուլիսի վերջում երգչախումբը կարճ ելույթ ունեցավ Կառավարության 3-րդ շենքում'ՀՀ մշակույթի նախարարությունում: