Մեր հիմնական խնդիրն ամբողջական կազմով հանդես չգալն է. Բերեզովսկի

Ֆուտբոլի Հայաստանի ազգային հավաքականի դարպասապահ Ռոման Բերեզովսկու խոսքով Հայաստանի հավաքականի համար մոտիվացիայի է նաև այն, որ կարող է խաղալ Ֆրանսիայի պես թիմի դեմ:

«Հաշվի առնելով, որ սերբերի հետ խաղում հավաքականի տղաները մեծ ուժերով էին խաղում, ապա այսօրվա խաղն այդքան էլ վատ չէր: Ինձ համար դժվար էր տաքությունով խաղալը, այդ իսկ պատճառով չխաղացի միչև խաղի ավարտը: Սերբերի հետ խաղում պաշտպանները խաղում էին 120 տոկոսով, իսկ այսօր հենց այդ 20 տոկոսը չկար և նրանք խաղում էին 80 տոկոսով միայն»,- «Արմենպրես»-ի հաղորդմամբ, Ֆրանսիայի հետ ընկերական խաղից հետո նման կարծիք հայտնեց Բերեզովսկին:

Անդրադառնալով գոլային իրավիճակներին ազգային թիմի դարպասապահը մասնավորապես շեշտեց. «Մեկնարկային րոպեներին տղաները դեռ նոր-նոր են մտնում խաղի մեջ, հենց այդ ժամանակ էլ միանգամից գնդակ բաց թողեցինք: Հակառակորդն էլ շատ լավ կարողացավ խաղարկել խաղային դրվագը»:

Բերեզովսկու կարծիքով՝ Հայաստանի հավաքականնի խնդիրն այն է, որ չի խաղում լիարժեք կազմով. «Մեր հիմնական խնդիրն ամբողջական կազմով հանդես չգալն է: Դրական նշան է նաև այն, որ սերբերի հետ խաղում մեզ շատ քիչ էր պակասում հաղթանակից: Ամեն օր չէ որ խաղում ես Ֆրանսիայի պես ուժեղ հավաքականի հետ, հենց դա որ մեզ համար մոտիվացիա էր»,-եզրափակեց Բերեզովսկին:

Հայաստանի ազգային թիմն ընկերական խաղում պարտվեց Ֆրանսիայի հավաքականի: Հայաստանի հավաքականի դարպասապահը մեկնարկային կազմում էր, սակայն երկրորդ կեսում նրա փոխարեն խաղը շարունակեց Գևորգ Կասպարովը: