«Հրապարակ». Հայտնի է դարձել, թե ՀԱԿ ցուցակի վիճելի հատվածն ինչ կազմ ունի

Երեկ արդեն հայտնի դարձավ, թե ՀԱԿ ցուցակի վիճելի հատվածն ինչ կազմ ունի: «Հրապարակ»-ը հիշեցնում է, որ ինքը գրել էր, որ մինչև 7-րդ տեղերը բաշխվելու էին հետևյալ կերպ. Լևոն Տեր-Պետրոսյան, Ստեփան Դեմիրճյան, Արամ Սարգսյան, Արամ Մանուկյան, Լևոն Զուրաբյան, Լյուդմիլա Սարգսյան և Նիկոլ Փաշինյան: 8-րդ տեղում գրվելու են Հրանտ Բագրատյանի, 9-րդում' Գագիկ Ջհանգիրյանի, 10-ում' Խաչատուր Սուքիասյանի անունները: Ցուցակի երկրորդ կինը, հակառակ որոշ կանխատեսումների, ոչ թե Զոյա Թադևոսյանն է, այլ Մանուշակ Պետրոսյանը: Զ. Թադևոսյանը երրորդն է' 16-րդ տեղում: 12, 13, 14-րդ տեղերում կլինեն Դավիթ Շահնազարյանը, Հովհաննես Հովհաննիսյանն ու Պետրոս Մակեյանը: 15-րդը Դավիթ Մաթևոսյանն է: Դրանից բարձր տեղերում գտնվողներն առանձնապես հույսեր չեն փայփայում խորհրդարանում հայտնվելու առումով: 17-րդ տեղն առաջարկվել է Սմբատ Այվազյանին, սակայն, ինչպես հայտնի է, «Հանրապետություն» կուսակցության անդամները, բացի Արամ Սարգսյանից, որոշել են հրաժարվել ցուցակում տեղ զբաղեցնելուց և որոշել են առաջադրվել մեծամասնական ընտրակարգով: Ընդհանրապես ՀԱԿ-ը որոշել է բոլոր մեծամասնական տարածքներում թեկնածուներ առաջադրել: Ասենք, Լևոն Զուրաբյանը կառաջադրվի Կենտրոնի թիվ 9 տարածքում' Ռուբեն Սադոյանի դեմ: Խաչատուր Սուքիասյանը' թիվ 10-ում, որտեղ առաջադրվելու է նաև Գարեգին Նուշիկյանը:

 Ըստ լուրերի, մեծամասնականով առաջադրվելու են նաև Նիկոլ Փաշինյանը, Դավիթ Շահնազարյանը և ուրիշներ: Քաղաքական դեմքերի առաջադրումն ըստ էության քաղաքական ակցիա կլինի՝ քրեաօլիգարխիկ ընտրությունների ու ընտրակաշառքների դեմ, քանզի ընդդիմությունը չի պատրաստվում մեծ ֆինանսական ծախսեր անել: