Նարեկ Գալստյանը սկեպտիկորեն է վերաբերում ոչ իշխանական եռյակի գործունեությանը

Սոցիալ-դեմոկրատ Հնչակյան կուսակցության ատենապետ Նարեկ Գալստյանը սկեպտիկորեն է վերաբերում ոչ իշխանական եռյակի գործունեությանը և նրանց սկսած քաղաքական գործընթացին: «Արմենպրես»-ի հետ զրույցում Նարեկ Գալստյանը համոզվածություն հայտնեց, որ Հայաստանում մեծ կապիտալ ունեցող քաղաքական ուժերը և գործարարները չեն կարող մտնել մի այնպիսի գործընթացի մեջ, որը երկրում համակարգային փոփոխությունների կհանգեցնի: «Սա կարմիր գծով գնացող ճշմարտություն է, և մենք դրա փորձն ունեցել ենք և տեսել ենք, թե հետխորհրդային երկրներում մեծ կապիտալի և պետության բախումները, թե դրանց արդյունքում տեղի ունեցող գործընթացները»,- նշեց ՍԴՀԿ ատենապետը:

Նարեկ Գալստյանն ընդգծեց, որ իր համար՝ որպես մարդու և Սոցիալ-դեմոկրատ Հնչակյան կուսակցության ներկայացուցչի, որը մաս է կազմել 2007-2009թթ. Լևոն Տեր-Պետրոսյանի գլխավորած համաժողովրդական շարժմանը, մեծ հիասթափություն է առաջացնում այն հանգամանքը, որ մարդը, ով 10 տարի լռությունից հետո վերադարձավ քաղաքականություն և հայտարարեց «Ավգյան ախոռները» մաքրելու պատրաստակամության մասին, այսօր լվանում, մաքրում և քաղաքական դաշտ է բերում մի օլիգարխի և օլիգարխիկ մի կազմակերպության, որն ընդամենը մի քանի տարի առաջ՝ 2008թ. նախագահական ընտրությունների ժամանակ, Լևոն Տեր-Պետրոսյանի խոսքերով, ծեծի էր ենթարկում իր կողմնակիցներին, որի փաստերը մինչ այսօր կան: «Հիմա մոռացե՞լ է Հայաստանի Հանրապետության առաջին նախագահն այս մասին, վստահ եմ, որ ոչ: Այդ դեպքում երկրորդ տրամաբանական հարցը՝ ինչո՞ւ է դա անում, ինչո՞ւ է մտնում մի գործընթացի մեջ, որը երկիրը ոչ մի լավ հանգրվանի չի հասցնելու»,- ընդգծեց Գալստյանը:

Նրա խոսքով՝ Հայաստանում այս պահին համակարգային փոփոխություններ են անհրաժեշտ. հարկավոր է վերջ դնել երկրում ստեղծված ամենաթողությանը, որը ձևավորվել է 90-ականների սկզբից: Գալստյանը հիշեց հայտնի ասացվածքը՝ «Անձրևից փախչում ես, ընկնում ես կարկուտի տակ»՝ ընդգծելով, որ մեր ժողովուրդը չպետք է անձրևից փախչի և կարկուտի տակ հայտնվի:

Նարեկ Գալստյանը համաձայն չէ ձևակերպման հետ, թե ժողովուրդը հավատում է ոչ իշխանական եռյակին. եթե որևէ քաղաքական ուժ կարողանում է հրապարակում 10 հազար մարդ հավաքել, դա բոլորովին չի նշանակում, որ այդ քաղաքական ուժի հետևում կանգնած է ժողովուրդը կամ դրա մեծամասնությունը: Նրա համոզմամբ ' ժողովուրդը ճկուն և փորձառու է և շատ լավ հասկանում է, թե յուրաքանչյուր գործընթացի տակ ինչպիսի ենթատեքստ կա թաքնված:

Խորհրդարանական ոչ իշխանական երեք ուժեր' Հայ ազգային կոնգրեսը, «Բարգավաճ Հայաստանը» և «Ժառանգությունը» հոկտեմբերի 10-ին համատեղ հանրահավաք անցկացրին: Թեև ավելի վաղ նրանց հետ համագործակցում էր նաև ՀՅԴ-ն, սակայն հանրահավաքից առաջ քառյակը եռյակ դարձավ' պատճառաբանությամբ, որ ՀՅԴ-ն սահմանադրական բարեփոխումներին կողմ է և չի ցանկանում հարթակում լինել այն ժամանակ, երբ երեք ուժերն անհամաձայնություն են հայտնում այդ ռեֆորմի առնչությամբ: