ՀՀ զինված ուժերն իրենց գործունեությամբ կոտրում են կարծրատիպերը. Սեյրան Օհանյան

Հայաստանը կոտրում է կարծրատիպը, թե պատերազմական վիճակում գտնվող զինված ուժերը չեն կարող լուրջ նախաձեռնություններ իրականացնել նաև բարեվարքության և ժողովրդավարության ամրապնդման հարցում:

ՀՀ ՊՆ Սեյրան Օհանյանի գնահատմամբ առավել զարգացած և առավել ժողովրդավար լինելու համար ՀՀ պաշտպանության նախարարությունն արդյունավետ համադրում է համագործակցային կարողությունները գործընկերների հնարավորությունների հետ:

«Արմենպրես»-ի փոխանցմամբ, «ԵԱՀԿ վարքի կանոնակարգը» խորագրով աշխատաժողովի ժամանակ նախարարը փաստեց, որ ԵԱՀԿ երևանյան գրասենյակը ՀՀ ԶՈՒ պաշտպանական բարեփոխումներին և դրա ժողովրդավարացմանն ուղղված օժանդակողներից է: Բարձր գնահատելով այդ համագործակցությունը' Օհանյանը նշում է, որ այն նաև բազմաթիվ կասկածներ է փարատում: «Միջազգային կառույցների մտավախությունը, թե անցումային փուլը հաղթահարող պետությունների զինված ուժերն ու պաշտպանական գերատեսչությունները կլինեն չափից դուրս պահպանողական և հակված չեն համագործակցության ու ժողովրդավարացման, մեր պարագայում չի համապատասխանում իրականությանը: Անկախությունից ի վեր ոչ պատերազմ, ոչ խաղաղություն վիճակ է, և մեր կամքից անկախ պատճառներով հայտնվում ենք ավելի շատ պատերազմի, քան խաղաղության վիճակում: Այս առումով կարող է հարց ծագել, թե ինչ ժողովրդավարության մասին կարող է խոսք լինել, եթե պատերազմ է: Մեր գործով կտրականապես հերքել ենք այս մոտեցումը: Մենք գտնում ենք, որ կիսապատերազմական վիճակում գտնվող երկիրը, որտեղ բանակը համալրվում է համընդհանուր զորակոչով, կարող է և պետք է վերածվի հասարակության զարգացման շարժիչ ուժի: Սա զուտ խոսքեր չեն, և մենք դա ապացուցում ենք գործով»,- ասաց Սեյրան Օհանյանը' հավելելով, որ բարեվարքության հիմքում քաղաքակիրթ աշխարհ կառուցելու տեսլականն է:

ՀՀ պաշտպանության նախարարության, ԵԱՀԿ երևանյան գրասենյակի ու ՆԱՏՕ-ի բարեվարքության ամրապնդման համատեղ ծրագրի շրջանակներում Երևանում կայացել է «ԵԱՀԿ վարքի կանոնակարգը» թեմայով աշխատաժողովը, որի նպատակն է իրականացման շրջանակների տարածումը, բազմաթիվ շահագրգիռ կողմերի ներգրավումն ու գործակցության ամրապնդումը միջազգային գործընկերների հետ: