ԴԱՀԿ-ն հետաքրքրված է ոլորտում տեղեկատվական տեխնոլոգիաների կիրառման էստոնական փորձով

ՀՀ գլխավոր հարկադիր կատարող, արդարադատության գեներալ-մայոր Միհրան Պողոսյանն ընդունել է Էստոնիայի դատական կատարողների և սնանկության կառավարիչների պալատի պատվիրակությանը՝ պալատի նախագահ Անդրես Հերմետի գլխավորությամբ, ովքեր Հայաստանում են Հարկադիր կատարման ծառայության կողմից կազմակերպված 2-րդ միջագային գիտագործնական համաժողովի շրջանակներում: Ինչպես «Արմենպրես»-ին տեղեկացրին ՀՀ ԴԱՀԿ մ ամուլի ծառայությունից, էստոնիացի գործընկերների հետաքրքրություների շրջանակն ընդգրկում էր ինչպես ծառայության պրակտիկ գործունեությունը, այնպես էլ դրա համար հիմք հանդիսացող օրենսդրական կարգավորումները: Պատվիրակությունը ՀՀ գլխավոր հարկադիր կատարողի ուղեկցությամբ շրջայց է կատարել ծառայությունում՝ տեղում ծանոթանալով աճուրդի կազմակերպման և գույքի իրացման մեխանիզմներին, ինչպես նաև տեղեկատվական տեխնոլոգիաների ներդրման հայաստանյան փորձին: Պատվիրակության ներկայացուցիչները նաև շրջայց են կատարել կատարողական վարույթներով երեխաների տեսակցության կազմակերպման համար նախատեսված «Հեքիաթ-տնակում», տեղում ծանոթացել ստեղծված պայմաններին:

Հանդիպման ընթացքում Միհրան Պողոսյանը նշել է, որ ՀՀ հարկադիր կատարման ծառայությունը հետաքրքրված է տեղեկատվական տեխնոլոգիաների կիրառման ոլորտում էստոնական փորձով, քանի որ այս առումով Էստոնիան լուրջ առաջընթաց է արձանագրել: Անդրես Հերմետն իր հերթին տեղեկացրել, որ Էստոնիայի դատական կատարողների և սնանկության կառավարիչների պալատը, համագործակցելով ԵՄ համապատասխան կառույցների հետ, մշակել և պատրաստվում է գործածել հարկադիր կատարողների, պարտապանի, պահանջատիրոջ և այլ կառույցների համատեղ աշխատանքն ապահովող նոր ծրագրային համակարգ: Միհրան Պողոսյանը հետաքրքրվել է այդ նորարական լուծումով և նշել, որ Հայաստանի հարկադիր կատարման ծառայության համար գերակա է տեղեկատվական տեխնոլոգիաների կիրառմամբ աշխատանքի արդյունավետության բարձրացումը:

Էստոնական պատվիրակության ղեկավարը վստահեցրել է, որ պատրաստակամ է Հարկադիր կատարման ծառայության աշխատակիցներին ներկայացնել ծրագիրը և կիսվել դրա մշակման ու ներդրման փորձով: Ծրագրի պիլոտային տարբերակը կմեկնարկի այս տարվա նոյեմբերի 15-ին, իսկ վերջնականը՝ 2015թ. մարտին: Կողմերը պայմանավորվածություն են ձեռք բերել ակտիվացնել փոխադարձ այցելությունները և աշխատանքային քննարկումները՝ երկու երկրների հարկադիր գործընկեր կառույցներում տեղեկատվական տեխնոլոգիաների կիրառման փորձն ուսումնասիրելու համար: Այդ նպատակով Անդրես Հերմետը Միհրան Պողոսյանին հրավիրել է Էստոնիա:

Էստոնիայի դատական կատարողների և սնանկության կառավարիչների պալատի նախագահ Անդրես Հերմետը հուշանվեր է հանձնել Միհրան Պողոսյանին, որն իր ուրույն տեղը կգտնի Ծառայության թանգարանում: Այնուհետև պատվիրակության անդամները եղել են Ծառայության թանգարանում, ապա, ի նշան բարեկամության, Էստոնիայի դատական կատարողների և սնանկության կառավարիչների պալատի նախագահ Անդրես Հերմետը եղևնի է տնկել Ծառայության բարեկամության պուրակում:

2013թ. մայիսի 16-ին ՀՀ հարկադիր կատարման ծառայության ու Էստոնիայի դատական կատարողների և սնանկության կառավարիչների պալատի միջև ստորագրվել է փոխըմբռնման հուշագիր: Հուշագրով կողմերի միջև համագործակցության հիմքեր են ստեղծվել և այսօր ամրագրվում են իրականացվելիք համատեղ աշխատանքները: