Եռյակն ԱԺ-ում ցանկացած պահի կարող է ընտրել բոյկոտի տարբերակը. Նաիրա Զոհրաբյան

Խորհրդարանում տեղի է ունեցել ոչ իշխանական եռյակի՝ ԲՀԿ-ի, ՀԱԿ-ի և «Ժառանգության» աշխատանքային հանդիպումը, որի ընթացքում անդրադարձ է կատարվել ԱԺ առաջիկա քառօրյային այդ երեք խմբակցությունների միասնական մարտավարությանը: Հանդիպման ավարտից հետո լրագրողների հետ զրույցում ԱԺ ԲՀԿ խմբակցության քարտուղար Նաիրա Զոհրաբյանն ընդգծեց, որ մի քանի նախաձեռնությունների հետ կապված տեխնիկական հարցեր են քննարկվել, որոնց բովանդակությունը, սակայն, չբացեց։

«Քննարկել ենք նաև հոկտեմբերի 24-ի հանրահավաքի հետ կապված տեխնիկական հարցեր: «Եռյակն» առաջ է գնալու սառը, կշռադատված, սթափ քայլերով, որևէ սադրանքի չի ենթարկվելու: Մենք ունենք մեր հստակ ծրագիրը, մենք հստակ գիտենք ժողովրդից եկած «մեսիջները» և այդ ծրագրով շարժվելու ենք առաջ: Հաջորդ հանրահավաքում, կարծում եմ, առանցքայինը լինելու է Գագիկ Ծառուկյանի ծրագրային ելույթը, և շատ հարցերի պատասխաններ դուք կստանաք»,- «Արմենպրես»-ի հաղորդմամբ՝ հայտնեց Զոհրաբյանը:

Նա հավելեց, որ եռյակը ցանկանում է արդյունավետ օգտագործել ԱԺ առաջիկա քառօրյան՝ ընդգծելով, որ բոյկոտը քաղաքական պայքարի գործիքներից մեկն է, և ցանկացած պահի եռյակը կարող է ընտրել նաև այդ տարբերակը: