Տեղի կունենա Արևմտահայերի Ազգային Համագումարի համաժողովը

Հոկտեմբերի 20-ին՝ ժամը 13.30-ին, Մելիք Ադամյան 1 հասցեում՝ Կառավարության նիստերի մեծ դահլիճում, տեղի կունենա Արևմտահայերի Ազգային Համագումարի համաժողովը։ Համաժողովը կազմակերպվում է Արևմտահայոց 4-րդ համագումարին ընդառաջ, որը կկայանա մինչև 2015 թ. ապրիլ ամիսը: Այդ համագումարի արդյունքում Թուրքիայի իշխանություններին կներկայացվի իրավաքաղաքական պահանջագիր՝ Օսմանյան կայսրության նախկին հայ քաղաքացիների ժառանգների շահերը և ոտնահարված իրավունքները վերականգնելու համար:

Հոկտեմբերի 20-ին կայանալիք համաժողովին մասնակցում են պետական, հանրային և մշակույթի գործիչներ, հայրենակցական միությունների անդամներ, ազգային փոքրամասնությունների ներկայացուցիչներ, Հայաստանում հավատարմագրված դիվանագետներ:

Արևմտահայերի Ազգային Համագումար միջազգային հասարակական կազմակերպությունը ստեղծվել է Սևրում 2011թ. դեկտեմբերին կայացած Արևմտահայոց 3-րդ համագումարի որոշումով, այնուհետև գրանցվել է Փարիզում և ՄԱԿ-ի Սոցիալական և տնտեսական ֆորումում:

Արևմտահայերի ազգային համագումարի գլխավոր նպատակն է տեր կանգնել արևմտահայերի՝ Օսմանյան կայսրության նախկին հայ քաղաքացիների 7 միլիոն ժառանգների իրավունքներին:

Այդ նպատակին էին ուղղված տարբեր գիտական ժողովներն ու կոնֆերանսները՝ որոնք քննարկում ու ավելի խոր պատկերացում էին տալիս, թե որն է հայկական հարցի իրական էությունը, որոնք են արևմտահայերի իրավունքները և ինչ իրավաբանական հիմքեր կան 100 տարի անց մեր իրավունքները վերականգնելու: Այս հարցերի և Թուրքիայում ներկայիս իրավիճակի լայնածավալ ուսումնասիրությունների արդյունքում կարևոր կապեր հաստատվեցին թուրքական շատ հասարակական կազմակերպությունների և լուրջ կշիռ ունեցող թուրք իրավաբանների հետ, որոնք այժմ աշխատում ու տարբերակներ են մշակում արևմտահայերի իրավունքների վերականգնման և նրանց կրած նյութական ու բարոյական վնասի փոխհատուցման ուղղությամբ:

Արևմտահայերի ազգային համագումարն ի սկզբանե հանդես է եկել որպես լիազոր ներկայացուցչական մարմին: Այն իր գործունեության մեջ ներառել է բազմաթիվ հայրենակցական միություններ, սփյուռքահայ կազմակերպություններ, որոնց մի շարք մասնաճյուղեր այժմ ակտիվ գործում են Հայաստանում, Ռուսաստանում, Միջին Արևելքում, Լիբանանում, ԱՄՆ-ում, Ֆրանսիայում, Անգլիայում և այլն: Այսպիսով, ստեղծվում է ներկայացուցչական մարմինների հզոր ցանց իրենց իսկ համայնքներում, իսկ Արևմտահայերի ազգային համագումարը հանդես է գալիս որպես արևմտահայերի շահերը Հայաստանում ներկայացնող լիազոր մարմին:

Արևմտահայերի շահերի ու պահանջատիրության բոլոր սկզբունքներն ամփոփող գլխավոր փաստաթուղթը վերջնական տեսք կստանա Արևմտահայոց 4-րդ համագումարում, որը նախատեսվում է անցկացնել մինչև 2015 թվականի ապրիլ ամիսը: Արևմտահայոց ազգային համագումարի իրավաքաղաքական Պահանջագիրը կազմված է՝ ներկայացնելու համար Թուրքիայի իշխանություններին: Պահանջագիրը կոչ է Թուրքիայի ժողովուրդներին, քաղաքացիական հասարակությանը և համաշխարհային հանրությանը՝ ձեռնարկել միջոցառումներ Օսմանյան կայսրության նախկին հայ քաղաքացիների ժառանգների անտեսված շահերը և ոտնահարված իրավունքները վերականգնելու համար: Արևմտահայերի ազգային համագումարը դիմել է արևմտահայ բոլոր կառույցներին, համայնքներին, գաղթօջախներին և հայրենակցական միություններին՝ կազմակերպելու խորհրդակցական հավաքներ ու ժողովներ Արևմտահայոց 4-րդ համագումարի նախապատրաստման և անցկացման համար: Համագումարը նաև գիտական բարձր մակարդակով կազմակերպելու համար ներգրավված կլինեն խնդրին գիտակ մասնագետներ և հեղինակավոր գիտնականներ: Եվ որ ամենակարևորն է՝ անհրաժեշտ է Պահանջագրի ու բոլոր առաջարկներին մասին տեղեկացնել Հայաստանի իշխանություններին, Հայաստանում գործող կարևոր կուսակցություններին և շարժումներին, սփյուռքում գործող բոլոր կազմակերպություններին՝ ստեղծելու համար լիարժեք ու միասնական Պահանջագիր: