Ադրբեջանը վտանգավոր է ոչ միան Հայաստանի, այլև միջազգային հանրության համար. Ռիչարդ Կիրակոսյան

Տարածաշրջանային հետազոտությունների կենտրոնի տնօրեն, քաղաքագետ Ռիչարդ Կիրակոսյանը որևէ ակնկալիք չունի Փարիզում հոկտեմբերի վերջին կայանալիք՝ Հայաստանի և Ադրբեջանի նախագահների հանդիպումից: Նա կարծում է, որ փարիզյան հանդիպումն էլ անարդյունավետ է լինելու: «Արմենպրես»-ի հետ զրույցում Կիրակոսյանը փաստում է, որ հանդիպումներն անարդյունավետ են, քանի որ հակամարտող պետություններից Ադրբեջանը որևէ կերպ չի նպաստում բանակցությունների միջոցով խնդրի կարգավորմանն ու անընդհատ իրավիճակը շեղող ու անկայուն քաղաքականություն է վարում:

«Ավելի շատ ակնկալիքներ պետք է ունենալ ոչ թե Երևանից, այլ Բաքվից, քանի որ Ադրբեջանն է սահմանին լարվածություն առաջացնում և հատկապես դիպուկահարների միջոցով իրավիճակն ապակայունացնում: Երևանի քաղաքականությունն այս առումով հասկանալի է, Բաքվինը' անհասկանալի և վտանգավոր»,- ասաց Կիրակոսյանը:

Խոսելով Ադրբեջանի գործողությունների մասին' թե՛ արտաքին ոլորտում, թե՛ ներքին կյանքում, Կիրակոսյանը խոստովանում է, որ որևէ քաղաքագետի համար դժվար է վերլուծել կամ հասկանալ Ադրբեջանի քաղաքականությունը, քանի որ այն, անիմաստ վտանգներ ստեղծելով, իրավիճակն ապակայունացնում է և ընդհանուր առմամբ գործում է անարդյունավետ:

Կիրակոսյանը հիշում է, որ այս տարվա հունիսին ՀՀ Ազգային ժողովի պատգամավորներ Կորյուն Նահապետյանի և Թևան Պողոսյանի հետ այցելել է Բաքու և այն, ինչ տեսել է, մտահոգել է թե՛ քաղաքագետին, թե՛ պատգամավորներին: «Մենք տեսանք անկայունություն, բազմաթիվ խնդիրներ, որ կար այդ երկրում, և համոզվեցինք, որ Ադրբեջանը վտանգավոր պետություն է ոչ միայն Հայաստանի կամ Լեռնային Ղարաբաղի Հանրապետության, այլ միջազգային համայնքի համար: Հենց դա է պատճառը, որ Ադրբեջանից չի կարելի սպասել որևէ լուրջ գործողություն, որևէ մտածված կամ մշակված քայլ, քանի որ այնտեղ անհասկանալի իրավիճակ է, անկայունություն և ոչ արդյունավետ կառավարում»,- ասաց Կիրակոսյանը: Նրա գնահատմամբ, ակնհայտ է, որ դիվանագիտական բանակցային գործընթացքում որևէ լուրջ փոփոխություն չի կատարվում: Այս տարի նախագահներն արդեն երրորդ անգամ են հանդիպում, բայց իրավիճակային որևէ փոփոխություն կարծես թե չկա:

Հոկտեմբերի վերջին Փարիզում կկայանա Հայաստանի և Ադրբեջանի նախագահների հանդիպումը: Երկու երկրների նախագահների հանդիպումը նախաձեռնել է Ֆրանսիայի նախագահ Ֆրանսուա Օլանդը, ով մայիսին Երևան և Բաքու կատարած պետական այցերի ժամանակ հայտարարել էր, որ կցանկանա Փարիզում քննարկել ԼՂ հակամարտության կարգավորմանն ուղղված հարցեր և այդ առնչությամբ հասնել լուրջ արդյունքների: Երկու երկրի նախագահների հանդիպումը պատրաստելու նպատակով նախորդ շաբաթ ԵԱՀԿ Մինսկի խմբի համանախագահներն այցելել են տարածաշրջան, եղել Բաքվում և Երևանում, հանդիպել երկու երկրների նախագահներին և արտաքին գործերի նախարարներին: Մինչ այս, տարվա ընթացքում Հայաստանի և Ադրբեջանի նախագահներն արդեն երկու անգամ հանդիպել են: Առաջին հանդիպումը կայացել է Սոչիում ՌԴ նախագահ Վլադիմիր Պուտինի նախաձեռնությամբ, երկրորդը' Ուելսում ԱՄՆ պետքարտուղար Ջոն Քերիի նախաձեռնությամբ: