ՀՀ-ԵՄ հարաբերությունները պետք է ավելի խորանան. Էստոնացի փորձագետ

Երևանում մեկնարկել է Հայաստանի և Եվրամիության հարաբերություններին նվիրված համաժողով-քննարկում, որի նպատակն է հասարակությանը տեղեկացնել Հայաստանում ԵՄ-ի գործողությունների և ԵՄ-ին աջակցող կազմակերպությունների գործունեության մասին:

«Արմենպրես»-ի փոխանցմամբ, երկօրյա համաժողովի ընթացքում, որի անունն է «ԵՄ հաղորդակցության դասընթաց», կներկայացվի էստոնական փորձը, և հայ ու էստոնացի մասնագետները կխոսեն տարբեր ոլորտներում համագործակցության մասին:

«Արևելյան գործընկերության էստոնական կենտրոնի» տնօրեն Մարգե Մարդիսալու-Կահարի գնահատմամբ, համաժողովի նպատակն է տարբեր ոլորտների ներկայացուցիչներին պատմել, թե Եվրամիությունն ինչպիսի ծրագրեր ու բարեփոխումներ է իրականացնելու Արևելյան գործընկերության վեց երկրներում: «Եվրամիությունը Հայաստանում շատ լուրջ ծրագրեր է իրականացնում, և Հայաստան-ԵՄ հարաբերությունները ժամանակի ընթացքում պետք է ավելի խորանան, և շատ ոլորտներում համագործակցությունը պետք է լինի ավելի ամուր»,- Ավետիք Իսկահակյանի անվան գրադարանում կայացած հանդիպման ժամանակ ասաց Մարգե Մարդիսալու-Կահարը' հավելելով, որ ԵՄ նախաձեռնություններին պետք է շատ մարդկանց ներգրավել և տեղեկացնել հասարակությանը կատարվելիք աշխատանքների մասին:

Տարածաշրջանային հետազոտությունների կենտրոնի տնօրեն, քաղաքագետ Ռիչարդ Կիրակոսյանի գնահատմամբ Հայաստանը միտված է խորացնել հարաբերությունները Եվրամիության հետ, և այդ ցանկությունը կիսում է, թե՛ իշխանությունը, թե՛ հասարակությունը: «Նախորդ տարվա սեպտեմբերի 3-ից հետո ես հայտարարեցի, որ ԵՄ դուռը փակ է Հայաստանի համար, բայց բարեբախտաբար թե՛ այն ժամանակ, թե՛ այսօր այն կողպված չէ, և այսօր Հայաստանը ներգրավված է նոր աշխատանքում և ձևակերպում է իրավական նոր համաձայնագիր Եվրամիության հետ հարաբերությունների կանոնակարգման և խորացման նպատակով: Այս առումով շատ կարևոր է երկուստեք լրատվամիջոցների և քաղաքացիական հասարակության դերակատարությունը, որպեսզի Հայաստանում և Եվրամիությունում կողմերը կարողանան լավ աշխատել»,- ասաց Ռիչարդ Կիրակոսյանը:

Հոկտեմբերի 20-ին Երևանում մեկնարկած համաժողովի նպատակն է ներկայացնել Եվրամիությունում Էստոնիայի անդամակցության փորձն ու ծառացած դժվարությունները, որոնք տասը տարվա ընթացքում էստոնացի հասարակությունը կարողացել է կարգավորել: Երկօրյա քննարկումներին կմասնակցեն հայ և էստոնացի քաղաքագետներ, փորձագետներ և խմբագիրներ: