Սևան քաղաքում բացվել է «Թուրին-Ավիլիանա» լուսանկարների ցուցահանդես

Իտալահայ բարերար Կարեն Կոկչյանի նախաձեռնությամբ Սևան քաղաքի մշակույթի պալատում բացվել է «Թուրին-Ավիլիանա» լուսանկարների ցուցահանդես: Ինչպես «Արմենպրես»-ին տեղեկացրեց Սևանի քաղաքապետարանի մամուլի քարտուղար Ար մինե Ղուկասյանը, Սևան քաղաքում բարեգործական ձեռնարկներով քանիցս աչքի ընկած իտալահայ Կարեն Կոկչյանը դեռևս ամիսներ առաջ Իտալիայի Հանրապետության Ավիլիանա քաղաքում կազմակերպել էր «Հայաստան» խորագրով լուսանկարների ցուցադրություն: Նրա կողմից հայաստանյան լուսանկարների միջոցով իտալացի այցելուները ճանաչել են հայ ժողովրդին ու Հայաստանը` իրենց համար բացահայտելով մի նոր իրականություն: «Թուրին-Ավիլիանա» լուսանկարների սևանյան ցուցադրության շնորհանդեսի առթիվ Սևան էին ժամանել Ավիլիանայի քաղաքապետ Անջելո Պատրից իոն, քաղաքապետի օգնական Առնալդո Ռեվիլիոն, որոնց ուղեկցում էր ցուցադրության հեղինակ Կարեն Կոկչյանը: Մշակութային իրադարձությանը մասնակցում էին նաև Հայաստանում Իտալիայի դեսպան Ջիովանի Ռիչուլին, ՀՀ սփյուռքի նախարարության Եվրոպայի հայ համայնքների վարչության Արևելյան Եվրոպայի հայ համայնքների կապերի հետ բաժնի պատասխանատու Կարեն Ավանեսյանը: Շնորհանդեսին նախորդեց ընդունելությունը Սևանի քաղաքապետ Ռուդիկ Ղուկասյանի մոտ:

Ընդունելության սկզբում մասնագիտությամբ երաժիշտ Ավիլիանայի քաղաքապետը իր տպավորությունները կիսեց Հայաստանում անցկացրած երկու օրերից, որը մեր երկիրը ճանաչելու լավ մեկնարկ է եղել:

Սևանի քաղաքապետ Ռուդիկ Ղուկասյանը հանդիպումը կարևորեց նախ հայ-իտալական ժողովուրդների բարեկամության ամրապնդման, ապա՝ ապակենտրոնցված համագործակցություն հաստատելու տեսանկյունից՝ դրվատելով Կարեն Կոկչյանի հանրօգուտ ձեռնարկները: Իսկ Սևան քաղաքի Ս. Զաքարյանի անվան մշակույթի պալատում պատվավոր հյուրերին աղուհացով, հայկական ազգագրական պարով, փողային նվագախմբի խրոխտ հնչյուններով դիմավորելուց հետո «Թուրին-Ավիլիանա» լուսանկարների ցուցադրության մասնակիցները նախ վայելեցին սևանցի երիտասարդ ստեղծագոր ծողների նկարչական աշխատանքները, որին հաջորդեց երկու քաղաքապետերի` Ռուդիկ Ղուկասյանի և Անջելո Պատրիցիոյի կողմից կարմիր ժապավենը կտրելու արարողակարգը:

Վեց տասնյակի հասնող լուսանկարչական աշխատանքներն ակնթարթներ էին, որ ներկաներին մոտեցնում էին իտալական մշակույթին ու բնաշխարհին, կենցաղին ու մարդկանց` դառնալով երկու ժողովուրդների բարեկամության ճանապարհին յուրօրինակ խաչմերուկ: Իրենց ելույթներում Հայաստանում Իտալիայի դեսպան Ջիովանի Ռիչուլին, Ավիլիանայի քաղաքապետ Անջելո Պատրիցիոն գնահատեցին Կոկչյանի աշխատանքը՝ միաժամանակ նշելով երկու ժողովուրդների և երկու քաղաքների բարեկամության, համագործակցության ճանապարհiն նման ձեռնարկների անհրաժեշտությունը: Սևանի քաղաքապետ Ղուկասյանը Կարեն Կոկչյանին պարգևատրեց քաղաքապետի պատվոգրով: Իտալացի հյուրերին սպասում էր ևս մեկ հաճելի անակնկալ, այս անգամ` պարերի փորձասրահում, որտեղ իրենց գեղեցիկ կատարումներով անկրկնելի պահեր պարգևեցին «Սևան» և «Սուինա-Սևան» պարային համույթի սաները` փորձասրահը վերածելով եվրոպական և հայկական մշակութային խաչմերուկի:

«Թուրին-Ավիլիանա» լուսանկարների ցուցադրությունը կշարունակվի մինչև հոկտեմբերի վերջը:

Խոսրով Խլղաթյան