Արարատի մարզում ավելացել են արտակարգ դեպքերը

Արարատի մարզի տարածքում այս տարվա ինն ամսվա ընթացքում գրանցվել է 638 արտակարգ դեպք, որոնց հետևանքով զոհվել են 16 և մարմնական վնասվածք ստացել 350 մարդ:

Ինչպես «Արմենպրես»-ի թղթակցին տեղեկացրեց Արարատի մարզային փրկարարական վարչության պետ, փ/ծ գնդապետ Մուրադ Մարգարյանը, նախորդ տարվա համեմատ արտակարգ դեպքերն աճել են 110-ով, զոհերի թիվը նվազել է յոթով, իսկ վիրավորների թիվը' 24-ով:

Նախորդ ինն ամսվա ընթացքում գրանցված դեպքերից 300-ը տեխնածին են, որոնք կազմում են ընդհանուր դեպքերի 47 տոկոսը: Դրանց հետևանքով զոհվել է 16 մարդ և վիրավորվել 138 մարդ: Տեխնածին բնույթի արտակարգ դեպքերը նվազել են հինգով: Նկատելի է, որ այս տարի հրդեհների դեպքերը նախորդ տարվա նույն ժամանակահատվածի համեմատ մարզում աճել են 57-ով' հասնելով 200-ի: Դրանք տեղի են ունեցել քաղաքացիներին պատկանող տարածքներում, հողամասերում' այրվելով չոր խոտ, հնձած ցորենի արտեր և անասնակեր:

Հրդեհների հետևանքով հաշվետու ժամանակահատվածում զոհվել է մեկ և վիրավորվել երկու մարդ: 2014 թվականի առաջին կիսամյակի ընթացքում մարզում գրանցվել են նաև մեկ ցրտահարության և մեկ ուժեղ քամու դեպք:

Մարգարյանը նշեց, որ այս տարվա ընթացքում սոցիալ-կենցաղային բնույթի դեպքերի թիվը հասել է 228-ի, զոհեր չեն գրանցվել, վիրավորվել են 212 մարդ: Նախորդ տարվա համեմատ սոցիալ-կենցաղային արտակարգ դեպքերն աճել են 137-ով: Հիշյալ դեպքերից զոհեր չեն եղել, վիրավորների թիվն աճել է 11-ով:

Լիլիթ Մաճկալյան