Վատիկանի կարդինալը չկորսված հայկական ինքությունն ու ժառանգությունն արժևորելու կոչ արեց

Երևանի պետական համալսարանը հյուրընկալել էր Վատիկանի մշակույթի քահանայապետական խորհրդի նախագահ, ԵՊՀ պատվավոր դոկտոր, կարդինալ Ջանֆրանկո Ռավազիին: Հանդիպմանը մասնակցում էին գիտխորհրդի անդամներն ու ուսանողներ: Արդեն երկրորդ անգամ ԵՊՀ այցելած կարդինալը դատարկաձեռն չէր եկել. հանդիպման ընթացքում տեղի ունեցավ «Սուրբ Գրիգոր Լուսավորիչ. քրիստոնեության ընդհանուր ժառանգություն» խորագրով գրքի հայերեն ու ռուսերեն թարգմանությունների ներկայացումը:

Ներկաներին ողջունեց ԵՊՀ ռեկտոր Արամ Սիմոնյանը՝ նշելով, որ կատարված աշխատանքը չափազանց կարևոր է թե հայկական, թե ողջ քրիստոնեության պատմության տեսանկյունից:
«Այս գիրքն ապացույցն է նրա, որ մեր առաջին քահանայապետը՝ Գրիգոր Լուսավորիչը, քրիստոնեական կրոնի պատմության մեջ անգնահատելի դեր է ունեցել: Մենք այսօր սիրով և ակնածանքով կլսենք նորին վսեմափայլությանը, ով կներկայացնի այս աշխատությունը»,-«Արմենպրես»-ի փոխանցմամբ՝ ասաց Արամ Սիմոնյանը:

«Այս աշխատությունը ներկայացումն է մի մեծ կերպարի, ով գերիշխում է ամբողջ հայ ժողովրդի ու նրա պատմության ընթացքում: Այս գրքում զետեղված լուսանկարներն էլ նկարագրում են այն տարածքն ու շրջանները, այն ժառանգությունը՝ իրական, թե լեգենդար, որ կապված են այս անձի հետ: Մենք հպարտանում ենք, որ ծանոթ ենք ձեզ հետ, մենք ձեզ համարում ենք առաջին քրիստոնյա ազգը»,-նշեց Ջանֆրանկո Ռավազին՝ հավելելով, որ Գրիգոր Լուսավորիչը ոչ միայն հայկական կրոնի ու մշակույթի մաս է, այլ նաև՝ Արևմտյան մշակույթի:

Նրա խոսքով՝ կրոնն ու մշակույթը սերտորեն կապված են ու մեկն առանց մյուսի, մի դեպքում՝ զուտ ֆոլկլոր է դառնում, մյուս դեպքում՝ առարկայական երևույթ: «Ես կցանկանայի հիշել այն կապը, որ գոյություն ուներ Գրիգոր Լուսավորչի և Տրդատի 3-րդի միջև, որն այն դրամատիկ հարաբերությունների կապն է, ինչը գոյություն ունի կրոնի ու աշխարհիկ կյանքի միջև: Ձեր այս հորն արժևորելը պետք է լինի ոչ միայն կրոնական, այլև մշակութային խնդիր, քանի որ դա ձեր ինքնության հարցն է»,-ասաց կարդինալը:

Նա հույս հայտնեց, որ իր գրած գիրքը հայ դպրոցականներին և ուսանողներին ևս հասու կլինի, որը նրանք կընկալեն ոչ միայն որպես կրոնական, այլև աշխարհագրական գիտելիքներ տվող աշխատություն: «Այս գիրքը, կարծում եմ, կլինի շատ կարևոր հատկապես երիտասարդների համար՝ ճանաչելու ձեր տարածքները՝ ձեր պատմության տեսնակյունից: Ես հնարավորություն եմ ունեցել այցելելու Հայաստանի տարբեր վանական համալիրներ, հուշարձաններ, որոնք կապված են Գրիգոր Լուսավորչի հետ: Կարևոր է նաև, որ համալսարանական դասընթացների ժամանակ դուք ճանաչեք այն հսկայական կերպարներին, որ ունեք»,-ավելացրեց Ջանֆրանկո Ռավազին:

Նա հայտնեց, որ ուսումնասիրում է հայկական գրականությունն ու իր համար բացահայտել է Դանիել Վարուժանին, ում աշխատանքներում տեսնում է հոգևորի և աշխարհիկի միջև մեծ կապը: Նա մեջբերեց նաև Գրիգոր Նարեկացու աղոթքներից մի հատված ու խորհրուրդ տվեց արժևորել այն ժառանգությունը, որ դարեդար փոխանցվել է հայերին և ամուր պահել ինքնությունը, որն Արևմուտքում հետզհետե վերանում է:

Հանդիպման ավարտին ԵՊՀ ռեկտորը պատվոր հյուրին նվիրեց սովետահայ կերպարվեստի, Հայոց ցեղասպանության ու Հայաստանի զբոսաշրջային վայրերի վերաբերյալ գրքեր, իսկ կարդինալ Ջանֆրանկո Ռավազին էլ հուշամեդալ շնորհեց մայր բուհին: