Հաջորդ տարի կրթության ոլորտի ծախսերը կավելանան 11.5 միլիարդ դրամով

Հայաստանի Հանրապետության 2015թ. պետական բյուջեի նախագծով կրթության ոլորտին նախատեսվում է հատկացնել 127 միլիարդ 620 միլիոն դրամ: Այս մասին Ազգային ժողովի մշտական հանձնաժողովներում ՀՀ 2015թ. պետական բյուջեի նախագծի նախնական քննարկմանը տեղեկացրեց ՀՀ ֆինանսների նախարարի առաջին տեղակալ Պավել Սաֆարյանը: «Սա, ըստ էության, հավասար է 2014թ. պետական բյուջեով նախատեսված գումարին: Այն կազմում է համախառն ներքին արդյունքի 2.62 տոկոսը: Դուք գիտեք, որ մենք երկրի զարգացման ծրագրով նախատեսել էինք, որ արդեն այս տարիներին մեր կրթության ծախսերը համախառն ներքին արդյունքում հասցնել 3.2 տոկոսի, սակայն 2009թ. տնտեսական ճգնաժամը մեզ այդ տեմպերից մի փոքր հետ գցեց, և արդյունքում մենք այսօր ունենք այն, ինչ ունենք»,- «Արմենպրես»-ի հաղորդմամբ՝ ասաց Սաֆարյանը:

Նա տեղեկացրեց, որ կրթության ոլորտի ընթացիկ ծախսերը եղել են 109 միլիարդ դրամ, իսկ 2015թ. ոլորտի ծախսերը կկազմեն 120,5 միլիարդ դրամ: «Աճն այստեղ զգալի է՝ 11 միլիարդ 528 միլիոն: Կապիտալ ծախսերի առումով մենք ունենք նվազում, որը պայմանավորված է երկու գործոնով: Առաջինը վարկային ծրագրերն են, իսկ երկրորդը դպրոցների վերանորոգման հետ կապված ծրագրերը»,- ընդգծեց Սաֆարյանը:

Կրթության ոլորտում շարունակելու է գերակա մնալ հանրակրթությունը: Պավել Սաֆարյանը տեղեկացրեց, որ կրթության ոլորտի ամբողջ ծախսերի շուրջ 70 տոկոսը հատկացվելու է հանրակրթությանը: «Հանրակրթության բնագավառում ծախսերի ավելացումը կազմել է 4.1 միլիարդ դրամ, ինչը պայմանավորված է աշխատավարձերի բարձրացմամբ, ինչպես նաև այն հանգամանքով, որ կառավարությունն առաջին անգամ ունի հանրակրթության ոլորտի ծախսերի ծրագրավորում, ինչի պատճառն աշակերտների և ուսուցիչների թվաքանակի ավելացումն է»,- նկատեց փոխնախարարը: