Թուրքիայի ԱԳՆ-ն` հայատյաց Փերինչեքի պաշտպան

Թուրքիայի արտաքին գործերի նախարար Մևլութ Չավուշօղլուն հայտարարել է, որ մոտիկից հետևում են Մարդու իրավունքների եվրոպական դատարանում Դողու Փերինչեք-Շվեյցարիա դատավարությանը և հանդիսանում են դատական գործընթացի կողմ:

Այս մասին, ինչպես հաղորդում է «Արմենպրես»-ը' վկայակոչելով թուրքական odatv.com լրատվական կայքը, Չավուշօղլուն հայտարարել է Թուրքիայի խորհրդարանի արտաքին հանձնաժողովում արտաքին քաղաքականության մեջ զարգացումների հետ կապված ելույթում:

Չավուշօղլուն ասել է, որ հայկական հարցում իրենք «պաշտպանվող կողմ չեն»: «Մենք մշտապես վերահաստատում ենք, որ անհնարին է, որ մենք ընդունենք մեր պապերի և ազգի վրա բարդվող ցեղասպանությունը»,- ասել է նա:

Անդրադառնալով ՄԻԵԴ-ում Թուրքիայի աշխատանքի կուսակցության առաջնորդ Դողու Փերինչեքի դատավարությանը' Չավուշօղլուն ասել է. «Մենք մոտիկից հետևում ենք այդ դատին: Շվեյցարիան այն փոխադրեց ՄԻԵԴ: Ֆրանսիան և Հայաստանը դատական գործընթացի կողմ դարձան: Մենք ևս կողմ ենք հանդիսանում այդ դատում, և հետևում ենք դատական գործընթացին»:

Հայատյաց գործունեությամբ հայտնի Դողու Փերինչեքը 2005 թվականին Շվեյցարիայում մի գիտական կոնֆերանսում հայտարարել էր, որ Հայոց ցեղասպանությունը «միջազգային սուտ է»: Լոզանի դատարանը Շվեյցարիայի քրեական օրենսգրքի համաձայն «ռասիստական խտրականության» հիմնավորմամբ դատապարտել էր Փերինչեքին: Վերջինս Թուրքիայի կառավարության հովանավորությամբ 2008 թվականին դիմել էր ՄԻԵԴ: 2013 թվականի դեկտեմբերի 17-ին ՄԻԵԴ-ը չեղյալ էր համարել շվեյցարական դատարանի որոշումը' նշելով, որ ոտնահարվել է Եվրոպայի մարդու իրավունքների համաձայնագրի «Արտահա յտվելու ազատությունը» հոդվածը: Շվեյցարիայի Վճռաբեկ դատարանի որշումն ուսումնասիրելուց հետո ՄԻԵԴ-ը չեղյալ է համարել իր նախկին որոշումը և դատական գործը փոխադրել ՄԻԵԴ բարձրագույն ատյանի վճռին: Հայաստանը ևս դիմել է ՄԻԵԴ և պահանջել դատական գործում կողմ ճանաչել նաև իրեն: