Թերթի 16 կրպակներից միանգամից գնել են «Չորրորդ ինքնիշխանության» թերթի խմբաքանակը

Լուրեր.com-ի տեղեկություններով՝ այսօր Զեյթուն և Ավան համայնքներում նույն անձը թերթի 16 կրպակներից գնել է «Չորրորդ ինքնիշխանություն» թերթի այսօրվա խմբաքանակը, ինչի հետևանքով ընթերցողները չեն կարողացել ձեռք բերել թերթը։
«Չորրորդ ինքնիշխանություն» թերթի լրագրող Գոհար Վեզիրյանից հետաքրքրվեցինք, թե թերթի այսօրվա համարում որևէ սկանդալային հրապակարում եղե՞լ է և ինչո՞վ կարող է պայմանավորված լինել 16 կրպակից թերթի խմբաքանակի գնումը։

Գ. Վեզիրյանն ասաց, որ սա կարող է պայմանավորված լինել թերթում «Հանցագործներին թողած՝ լրագրողներին են հարցաքննում» հոդվածի տպագրության հետ։

Հոդվածը օրերս մեր կայքում հրապարակված այն տեղեկատվության մասին է, ըստ որի՝ օրերս Քանաքեռի զորամասից ՀՀ ՊՆ Երևանի կայազորի Ռազմական ոստիկանություն են բերման ենթարկվել մի խումբ զինծառայողներ, որոնք ռազմական ոստիկանությունում դաժան ծեծի են ենթարկվել։

Հիշեցնենք, որ ավելի վաղ գրել էինք, որ զինծառայողներին ծեծի են ենթարկել ՀՀ ՊՆ Երևանի կայազորի Ռազմական ոստիկանության պետ Ռուբեն Ներսիսյանն ու քրեական հետախուզության աշխատակից Հարություն Ոփանյանը։ Միջադեպը կոծկելու նպատակով՝ ավելորդ աղմուկից խուսափելու համար, Արսեն Գրիգորյանին արձակուրդ են տրամադրել, որպեսզի վերջինս իր բուժումն անցնի տնային պայմաններում։

Երեկ ՀՀ ՊՆ Երևանի կայազորի Ռազմական ոստիկանության քննչական վարչություն էր հրավիրվել Լուրեր.com կայքի թողարկման պատասխանատու Ա. Մինասյանը՝ հրապարակման վերաբերյալ պարզաբանումներ տալու նպատակով։ Վերջինս, հղում անելով Զանգվածային լրատվության մասին ՀՀ օրենքի 5-րդ հոդվածին, հրաժարվել է քննիչին հայտնել տեղեկատվության աղբյուրի տվյալները:

«Չորրորդ ինքնիշխանություն» թերթը ծավալուն հոդվածով անդրադարձել է միջադեպին։ Ա. Մինասյանը, մեկնաբանելով իրեն քննչական մարմին հրավիրելու փաստը, թերթի հետ զրույցում ասել է. «Ես չեմ կարող բացառել, որ սա իմ նկատմամբ յուրօրինակ ճնշման միջոց է՝ կապված իմ լրագրական և/կամ «Բանակն իրականում» նախաձեռնության շրջանակներում իմ ծավալած գործունեության հետ:

Քննչական մարմիններին խորհուրդ կտայի լրագրությամբ զբաղվող քաղաքացիներին անհանգստացնելու, տեղեկատվության աղբյուրները բացահայտելուն ուղղված ջանքեր գործադրելու փոխարեն ժամանակն ու էներգիան ծախսել հանցագործությունների բացահայտման ուղղությամբ: Մենք բոլորս շատ լավ գիտենք, թե որքան արագ են տեղեկություններն՝ ամենայն մանրամասնությամբ, տարածվում մեր հասարակությունում, առավել ևս՝ բանակում տեղի ունեցող իրադարձությունների կապակցությամբ, ուստի քննչական մարմինները ցանկության դեպքում հեշտությամբ կարող են պարզել հանցագործությունների բոլոր դրվագներն՝ առանց լրագրողներին անհանգստացնելու: Միամտություն կլինի կարծել, թե լրագրությամբ զբաղվող անձանց քննչական մարմիններ են կանչում՝ նրանց ունեցած տեղեկությունների հետքով հանցագործներին կամ հանցագործության հանգամանքները պարզելու նպատակով, քանի որ մենք բոլորս շատ լավ հասկանում ենք, որ իրենք այդ տեղեկությունները ստանում են լրագրողնեևրից շատ ավելի արագ:

Զարմանալին այն է, որ նյութերի նախապատրաստման փուլում քննչական մարմիններն առաջին հերթին անհանգստացնում են լրագրողներին, այնինչ լրագրողի տրամադրած տեղեկատվության մեջ նշված՝ հանցագործությունն իրականացրած անձինք դեռևս քննչական մարմիններ չեն հրավիրվել, թեև տրամաբանությունը հուշում է, որ իրավապահները նախ և առաջ պետք է զբաղվեն հնարավոր հանցագործներին ու տուժող կողմին հարցաքննելով: Հատկանշական է, որ քննչական մարմնում դեռևս չէին պարզել կայքում զետեղված տեղեկատվության մեջ նշված տուժող զինծառայողի ինքնությունը: Այսինքն՝ կարող ենք փաստել, որ ՀՀ ՊՆ-ն շարունակում է իր արատավոր գործելաոճը և ճնշումներ է բանեցնում լրագրական դաշտի վրա՝ միջադեպերի լիարժեք քննությամբ զբաղվելու փոխարեն»:

Հ.Գ. Ավելի ուշ հայտնի դարձավ, որ «Չորրորդ ինքնիշխանության» այսօրվա համարը բացակայում է նաև Նոր Նորքի թերթի կրպակներում։