ՄԱԿ-ի անդամների կեսից պակասն է քվեարկել Իրանում մարդու իրավունքների վերաբերյալ բանաձևի օգտին

ՄԱԿ-ի անդամ 193 երկրների կեսից պակասն է նոյեմբերի 18-ին պաշտպանել այն բանաձևը, որն Իրանի իշխանություններին մեղադրում է իր քաղաքացիների իրավունքների «լուրջ խախտումների» մեջ: Չնայած դրան, փաստաթուղթն, այնուամենայնիվ, ընդունվել է ձայների պարզ մեծամասնությամբ, տեղեկացնում է «Արմենպրես»-ը:

Քվեարկության ընթացքում Կանադայի կողմից ներկայացված բանաձևին աջակցություն է հայտնել 78 երկիր՝ գլխավորապես ՆԱՏՕ-ի անդամները, ինչպես նաև Իսրայելը: Փաստաթղթի ընդունմանը դեմ է արտահայտվել 35 պետություն, այդ թվում՝ Ռուսաստանը, Բելառուսը, Բոլիվիան, Եգիպտոսը, Հնդկաստանը, Իրաքը, Ղազախստանը, Չինաստանը, ԿԺԴՀ-ն, Կուբան և Լիբանանը: Եվս 69 երկիր ձեռնպահ է մնացել, այդ թվում՝ Բրազիլիան, Հորդանանը, Լիբիան, Սաուդյան Արաբիան և Հարավաֆրիկյան Հանրապետությունը:

Փաստաթղթում «խորը մտահոգություն» է հայտնվում Իսլամական Հանրապետությունում մարդու իրավունքների խախտումների, այդ թվում՝ «խաղաղ հավաքներ անցկացնելու, ազատախոհության և կարծիքներ հայտնելու համատարած և լուրջ սահմանափակումների», ինչպես նաև «իրավապաշտպանների սիստեմատիկ հետապնդումների և ճնշումների» և լրագրողների, բլոգերների ու սոցիալական ցանցերի օգտատերերի վերսկսված բռնաճնշումների կապակցությամբ:

Բացի այդ, բանաձևը Թեհրանին մեղադրում է ընդդիմադիրների կամայական մահապատիժների, կտտանքների և հալածանքների, ինչպես նաև կանանց, կրոնական ու լեզվական փոքրամասնությունների խտրականության մեջ՝ պահանջելով դադարեցնել այդօրինակ պրակտիկան, հաղորդել է ՏԱՍՍ-ը: