ՌԴ կառավարությունը քննարկելու է ԵՏՄ-ին Հայաստանի միանալու մասին պայմանագրի վավերացումը

Ռուսաստանի կառավարությունը նոյեմբերի 20-ի նիստում քննարկելու է Եվրասիական տնտեսական միության պայմանագրին Հայաստանի Հանրապետության միանալու պայմանագիրը Ռուսաստանի նախագահին ներկայացնելու հարցը՝ վավերացման առաջադրելու հայմար, տեղեկացնում է «Արմենպրես»-ը՝ հղում անելով ՌԴ նախարարների կաբինետի մամուլի ծառայությանը:

«Եվրասիական տնտեսական միության 2014 թվականի մայիսի 29-ի պայմանագրին Հայաստանի Հանրապետության միանալու վերաբերյալ պայմանագիրը վավերացման առաջադրելու համար ՌԴ-ի նախագահին ներկայացնելու մասին: Միանալու վերաբերյալ պայմանագիրը բազային փաստաթուղթ է, որը բովանդակում է Ռուսաստանի, Բելառուսի Հանրապետության և Ղազախստանի Հանրապետության պայմանավորվածությունները Եվրասիական տնտեսական միությանը Հայաստանի Հանրապետության միանալու պայմանների շուրջ և մտնում է Միության իրավունքի մեջ, որը ստեղծվում է Եվրասիական տնտեսական միության մասին 2014 թվականի մայիսի 29-ի պայմանագրով»,- ասված է փաստաթղթի տեքստում:

Նշվում է, որ պայմանագրի ուժի մեջ մտնելը կապահովի 2015 թվականի հունվարի 2-ից Հայաստանի մասնակցությունը ԵՏՄ-ի գործունեությանը և թույլ կտա գործարկել բացառումների և սահմանափակումների, այդ թվում՝ արգելքների կրճատման գործընթացը, ձեռնարկատիրական գործունեության սուբյեկտների փոխադարձ մուտքը Պայմանագրի մասնակից պետությունների շուկա:

Եվրասիական տնտեսական միությունը միջազգային ինտեգրացիոն տնտեսական միավորում է, որի ստեղծման մասին պայմանագիրը 2014 թվականի մայիսի 29-ին ստորագրել են Ռուսաստանը, Բելառուսը և Ղազախստանը: Այն ուժի մեջ կմտնի 2015 թվականի հունվարի 1-ից, հաղորդել է ՌԻԱ Նովոստին: