ԱՊՀ-ի կառավարությունների ղեկավարների խորհրդի հաջորդ նիստը կանցկացվի Աստանայում

ԱՊՀ-ի կառավարությունների ղեկավարների խորհրդի հաջորդ նիստը կանցկացվի 2015 թվականի մայիսի 29-ին Ղազախստանի մայրաքաղաք Աստանայում: Այդ մասին, ինչպես տեղեկացնում է «Արմենպրես»-ը, հայտնել է ԱՊՀ-ի գործադիր կոմիտեի նախագահ Սերգեյ Լեբեդևը:

Նոյեմբերի 21-ին Թուրքմենստանի մայրաքաղաք Աշխաբադում ընթանում է խորհրդի նիստը:

«Ղազախստանի Հանրապետության առաջարկությամբ որոշվել է կառավարությունների ղեկավարների խորհրդի հերթական նիստը անցկացնել 2015 թվականի մայիսի 29-ին Աստանայում»,- ասել է Լեբեդևը խորհրդի ընդլայնված նիստում:

Նա հայտնել է, որ խորհրդի նեղ կազմով նիստում պատվիրակությունների ղեկավարները քննարկել են տնտեսական համագործակցության հրատապ հարցերը, այդ թվում՝ ազատ առևտրի գոտու վերաբերյալ պայմանագրի դրույթների իրագործման ընթացքը:

Կառավարությունների ղեկավարների խորհրդի այսօրվա նիստին մասնակցում են յոթ երկրի՝ Ռուսաստանի, Հայաստանի, Բելառուսի, Ղազախստանի, Ղրղզստանի, Տաջիկստանի և Ուզբեկստանի վարչապետները: Ադրբեջանը և Թուրքմենստանը ներցկայացված են առաջին փոխվարչապետներով, Ուկրաինան ներկայացնում է Թուրքմենստանում հանրապետության դեսպանը, իսկ Մոլդովան՝ Բելառուսում երկրի դեսպանը:

ԱՊՀ-ի ազատ առևտրի գոտին ստեղծում են ութ հանրապետություններ, բացառությամբ Ադրբեջանի և Թուրքմենստանի: Տաջիկստանն ստորագրել է պայմանագիրը, բայց առայժմ այն չի վավերացվել, հաղորդել է ՌԻԱ «Նովոստին»: