Ադրբեջանի իշխանությունը հոգեվարքի մեջ է. մտավորական

Ադրբեջանում վերագործարկվել է 37 թվականի բռնաճնշումների մեքենան: Այստեղ ազատ մտածողությամբ մարդկանց դեմ պայքարի մեթոդ է ընտրվել ռեպրեսիան: Այդ մարդկանց զուգահեռ' իշխանությունը բռնաճնշումների է ենթարկում նաև նրանց մերձավորներին:

Այս մասին, ինչպես հաղորդում է «Արմենպրես»-ը, հայտարարել է Ադրբեջանի ժողովրդական ճակատ կուսակցության մամուլի ծառայության ղեկավար, «Ազադլըգ» թերթի և «Ադրբեջան սաաթը» հեռուստածրագրի աշխատակից Նաթիգ Ադիլովը:

«Ազադլըգ»-ի այն հարցադրմանը, թե քաղաքական հայացքների համար մարդկանց մերձավորներին ու երեխաներին ևս ճնշումների ենթարկելն ու բանտեր նետելն ի՞նչ տրամաբանություն է բովանդակում, Ադրբեջանում ճանաչված փաստաբան Վիդադի Միրքամալն ասել է, որ Եվրոպային ինտեգրվել ցանկացող պետության մեջ նման իրադարձություններն անհասկանալի են:

Նրա խոսքով' ժողովրդավարական երկրներում իշխանությանը զուգահեռ ընդդիմություն և քաղաքացիական հասարակություն էլ պետք է լինեն, քանի որ հասարակությունը չի կարող կազմված լինել միայն իշխանությունից և նրա կողմնակիցներից:

«1993 թվականից սկսած' Ադրբեջանի իշխանությունն իր բոլոր ջանքերն ուղղել է ընդդիմությանն, ազատ մտածող մարդկանց լռեցնելուն: Ռեպերսիաներ է սկսել կոռուպցիան բացահայտող և այդ մասին բարձրաձայնող, դրանք հանրությանը հասցնող մարդկանց դեմ: Իշխանությունը սպառնում է ոչ միայն այդ անձանց, այլ նաև նրանց մերձավորներին և աշխատում լռեցնել բոլորին: Ճնշումներ են գործադրվում ընդդիմադիր մտավորականների, երիտասարդների դեմ: Այդ կերպ և նման վերաբերմունքով Ադրբեջանը երբեք ժողովրդավարական պետություն չի կարող դառնալ»,- ասել է նա:

Վիդադի Միրքամալը վստահություն է հայտնել, որ իշխանության այդ քաղաքականությունը որոշ ժամանակ հետո ուղղվելու է հենց իր դեմ:

Ադրբեջանի մտավորականների միության ղեկավար Էլդանիզ Գուլիևն էլ ասել է, որ Ադրբեջանում կրկնվում է անցյալ դարի 37 թվականը: Նրա խոսքով' նման ճնշումներ նույնիսկ այն ժամանակ չեն եղել ազատ մտքի մարդկանց ընտանիքների դեմ: «Այս բոլորը խոսում են ներկայիս իշխանության հոգեվարքի մասին»,- ընդգծել է նա: