Լատվիայի նախագահը Թբիլիսիում բանակցություններ է վարում Վրաստանի ղեկավարության հետ

Լատվիայի նախագահ Անդրիս Բերզինշը նոյեմբերի 26-ին սկսում է պաշտոնական հանդիպումները Վրաստանում: Լատվիայի ղեկավարը Վրաստանի նախագահ Գեորգի Մարգվելաշվիլիի հրավերով Թբիլիսի է ժամանել նախօրյակին ուշ երեկոյան, տեղեկացնում է «Արմենպրես»-ը՝ հղում անելով «Նովոստի Գրուզիային»:

Այցի պաշտոնական մասը կսկսվի նախագահական պալատում կայանալիք ընդունելությամբ: Նաև պլանավորվաած են Լատվիայի նախագահի հանդիպումները Վրաստանի վարչապետի և խորհրդարանի նախագահի հետ: Այցի շրջանակներում նախատեսված է մի շարք երկկողմ փաստաթղթերի ձևակերպում:

Նոյեմբերի 27-ին Լատվիայի և Վրաստանի նախագահները կուղևորվեն Աջարիա: Անդրիս Բերզինշը ներկա կգտնվի Լատվիայի պատվավոր հյուպատոսարանի բացման արարողությանը և գործարար համաժողովի շրջանակներում ներդրումային նախագծերի շնորհանդեսին: Բացի այդ, պայմանագիր կստորագրվի եղբայր քաղաքների՝ Բաթումի և Յուրմալայի միջև:

Լատվիայի նախագահը կայցելի Ծովային ակադեմիա, որտեղ կողմերը կստորագրեն համագործակցության հուշագիր: Լատվիայի պատվիրակությունը, որի կազմում են երկրի գործադիր իշխանության և գործարար շրջանների ներկայացուցիչները, Վրաստանից կմեկնի նոյեմբերի 27-ին: