Քաջարանում հրդեհից տուժած կինը մահացել է հիվանդանոցում

Նոյեմբերի 27-ին ժամը 22.35-ին Քաջարան քաղաքի Բարիկավան թաղամասի թիվ 2 շենքի Ալբերտ Հարությունյանին պատկանող թիվ 1 բնակարանում բռնկված հրդեհից տուժած ամուսիններից կինը՝ Անգին Ազարյանը՝ ծնված 1937թ., նոյեմբերի 28-ի առավոտյան մահացել է հիվանդանոցում:

Ինչպես «Արմենպրես»-ին հայտնեց Կապանի բժշկական կենտրոնի վնասվածքաբանական բաժնի վարիչ Սարիկ Աթաջանյանը, ամուսինները հիվանդանոց են տեղափոխվել թեթև այրվածքներով, իսկ կնոջ մահվան պատճառն այն է, որ նա տառապելիս է եղել քաղցկեղով և վերջին օրերին համարյա թե անգիտակից վիճակում է եղել: «Ամուսինը՝ Ալբերտ Հարությունյանը՝ ծնված 1938թ., հրդեհից ստացել է թեթև այրվածքներ, սակայն տառապում է Պարկինսոնի հիվանդության ծանր տեսակով, ինչի պատճառով վիճակն այս պահին գնահատվում է ծանր»,- ասաց Աթաջանյանը:

Ենթադրվում է, որ հենց ամուսինների անօգնական վիճակի պատճառով էլ բնակարանում հրդեհ է բռնկվել: Հրդեհի վերաբերյալ ահազանգ ստանալուն պես դեպքի վայր է մեկնել մեկ մարտական հաշվարկ: Հրդեհը մեկուսացվել է ժամը 23.11-ին, մարվել՝ 23.17-ին: Մասամբ այրվել և ջերմահարվել է բնակարանի գույքը:

Գոհար Իսախանյան