Լեհաստանի նախկին վարչապետ Տուսկը դառնում է պատմության մեջ Եվրամիության երկրորդ ղեկավարը

Լեհաստանի նախկին վարչապետ Դոնալդ Տուսկը դեկտեմբերի 1-ին Եվրախորհրդի նախագահի պաշտոնում փոխարինում է Բելգիայի նախկին վարչապետ Հերման վան Ռոմպեյին, որն այդ պաշտոնում հինգ տարի է նվիրել Եվրամիության անդամ երկրների միջև փոխհամաձայնության հաստատմանը, տեղեկացնում է «Արմենպրես»-ը: 

Տուսկը կդառնա Եվրոպայի պատմության մեջ Եվրախորհրդի՝ Եվրամիության այն ինստիտուտի երկրորդ մշտական ղեկավարը, որը միավորում է անդամ երկրների պետությունների և կառավարությունների ղեկավարներին և ընդունում է առավել կարևոր ռազմավարական որոշումները: Վան Ռոմպյոյն այս պաշտոնն ստանձնել էր 2009 թվականի վերջին՝ այն բանից անմիջապես հետո, երբ այն ստեղծվեց Լիսաբոնի պայմանագրով, իսկ 2012 թվականի մարտին վերընտրվել էր հաջորդ 2,5 տարվա համար:

Փորձագետները համակարծիք են, որ նոր նախագահի համար առաջին մարտահրավերը կլինի Եվրոպայի տնտեսության վերականգնումը: Տուսկը՝ որպես Եվրախորհրդի նախագահ, կղեկավարի նաև եվրոգոտու գագաթնաժողովները, որի մեջ իր երկիրը չի մտնում:

Արտաքին քաղաքականության բնագավառում Տուսկի համար գլխավոր մարտահրավերը կդառնան, ամենից առաջ, ուկրաինական ճգնաժամը և Եվրամիության ապագա հարաբերությունները Ռուսաստանի հետ: Անցյալ շաբաթ Լեհաստանի նախկին վարչապետը հստակորեն նշել է իր դիրքորոշումը Financial Times թերթում հրապարակված հարցազրույցում՝ Ռուսաստանը համարելով ոչ թե ռազմավարական գործընկեր, այլ «ռազմավարական հիմնախնդիր», հաղորդել է ՌԻԱ «Նովոստին»: