Արքայազն Ուիլյամը և դքսուհի Քեյթը ժամանել են Նյու Յորք

Նյու Յորքի ամենահայտնի երկրնաքերը՝ 12-հարկանի Empire State Building-ը, դեկտեմբերի 7-ի երեկոյան Մեծ Բրիտանիայի դրոշի սպիտակ, կարմիր և կապույտ գույներով են լուսավորել ի պատիվ արքայազն Ուիլյամի ու նրա տիկնոջ ԱՄՆ ժամանման: Ինչպես հայտնել է շենքի վարչակազմը, լուսային գունավորումը կպահպանվի Քեմբրիջի դքսի և դքսուհու այցի ողջ ընթացքում՝ մինչև դեկտեմբերի 9-ը, տեղեկացնում է «Արմենպրես»-ը:

Հյուրերը British Airways ընկերության չվերթով Լոնդոնից ժամանել են Ջոն Քենեդու անվան օդանավակայան, որտեղից ուղևորվել են Նյու Յորքի Մանհեթեն շրջանի Carlyle հյուրանոց: Հենց այստեղ էր նախընտրել իջևանել Ուիլյամի մայրը՝ Ուելսի արքայադուստր Դիանան: ԶԼՄ-ների տեղեկությունների համաձայն՝ Ուիլյամի և Քեյթի համարից տեսարան է բացվում դեպի Նյու Յորքի Կենտրոնական զբոսայգի:

Զույգի ժամանումից դեռ մի քանի ժամ առաջ հյուրանոցի շենքի մոտ, որը նույնպես զարդարված է բրիտանական դրոշներով, հավաքվել են երկրպագուները: Լրագրողների հետ զրույցներում նրանք խոստովանել են, որ հատկապես հույս ունեն տեսնել դքսուհի Քեյթին: Սեպտեմբերին Բուքինգհեմյան պալատի պաշտոնական ներկայացուցիչները հայտարարել էին, որ նա երկրորդ երեխային է սպասում:

«Ես պարզապես ցանկանում եմ ողջունել նրանց Նյու Յորքում,- պատմել է Հառլեմ շրջանի բնակիչ Ջեյմս Բերդենը:-Շատ անսովոր կլինի նրանց նայելը: Հուսով եմ, որ նրանք էլ հայացք կնետեն իմ կողմը»: «Քեյթը հիրավի արժանի է ընդօրինակման,- նշել է Բոստոնի բնակչուհի Ստեֆանի Ռայանը, որը ժամանել է Նյու Յորք:- Նրա տեսքից երբեք չի երևում, որ նա նյարդայնանում է կամ վախեցած է: Նա միշտ վստահ տեսք ունի, բացի այդ նա ամուսնացած է արքայազնի հետ: Եթե նա ինձ ձեռքով անի, ապա ես կհամարեմ, որ օրս հաջողված է»:

Ուղևորության ընթացքում Ուիլյամին ու Քեյթին ուղեկցում է յոթ մարդ, այդ թվում՝ քարտուղարներ, խորհրդական ու ոճաբան: Իրենց մեկամյա որդուն՝ Ջորջին, Ուիլյամն ու Քեյթն իրենց հետ չեն վերցրել:

Դեկտեմբերի 7-ի երեկոյան պլանավորված էր զույգի մասնակցությունը բարեգործական ընթրիքի: Դեկտեմբերրի 8-ին Մեծ Բրիտանիայից ժամանած հյուրերը, ինչպես սպասվում է, ներկա կգտնվեն բասկետբոլի մրցախաղի, հանդիպում կունենան ԱՄՆ-ի նախկին պետքարտուղար Հիլարի Քլինթոնի, նրա դստեր՝ Չելսիի, երգչուհի Բեյոնսեի, ինչպես նաև նրա ամուսնու՝ ռեփեր Ջեյ Զիի հետ:

Այցի ընթացքում Ուիլյամը նաև պետք է Սպիտակ տանը հանդիպում ունենա ԱՄՆ-ի նախագահ Բարաք Օբամայի հետ: Բրիտանացի հյուրերը կայցելեն 2001 թվականի սեպտեմբերի 11-ի ահաբեկչական գործողությունների հետևանքով զոհվածների հիշատակի թանգարան, ինչպես նաև ԱՄՆ-ի խոշորագույն գեղարվեստական թանգարանը՝ Մետրոպոլիտեն: Ինչպես հայտարարել են Սպիտակ տան ներկայացուցիչները, Քեմբրիջի դքսի ու դքսուհու այցը պետք է ընդգծի ԱՄՆ-ի և Մեծ Բրիտանիայի «փոխհարաբերությունների առանձնահատուկ կարգավիճակը», հաղորդել է ՏԱՍՍ-ը: