Վրաստանի հարևաններն անհանգստացած են ՆԱՏՕ-ի հետ նրա ռազմական համագործակցությունից. ՌԴ ԱԳՆ

Վրաստանի հարևաններն անհանգստացած են ՆԱՏՕ-ի հետ նրա ռազմական գործակցության ծավալումից: Այդ մասին, ինչպես տեղեկացնում է «Արմենպրես»-ը, ՏԱՍՍ-ի թղթակցի հետ զրուցելիս հայտարարել է ՌԴ արտաքին գործերի փոխնախարար Գրիգորի Կարասինը:

«Շատ են այն բանի վկայությունները, որ Վրաստանը վերջին տարիներին եռանդագին խորացնում է գործընկերությունն ու փոխգործակցությունը ՆԱՏՕ ռազմական դաշինքի հետ,- նշել է նա:- Հենց դա էլ աճող մտահոգություն է առաջացնում թե՛ Սուխումում, թե՛ Ցխինվալում»:

Սեպտեմբերին Ուելսում կայացած ՆԱՏՕ-ի գագաթնաժողովում, հիշեցրել է Կարասինը, «ընդունվել է Վրաստանի հետ ուժեղացված համագործակցության փաթեթ, որն այլ բաղադրիչների հետ միասին, ներառում է ռազմատեխնիկական համագործակցության ընդլայնումը, Վրաստանում վարժական կենտրոնի բացումը, որտեղ մեծացվելու է այդ երկրի պաշտպանական հզորությունը, և որտեղ աշխատելու են դաշինքի հրահանգիչները»:

Կարասինը Ռուսաստանի պատվիրակությունը գլխավորում է Ժնևում անցկացվող քննարկումներում, որոնք նվիրված են Անդրկովկասի անվտանգությանն ու կայունությանը: Դեկտեմբերի 10-ին կայացել է այդ քննարկումների 30-րդ փուլը՝ Աբխազիայի, Վրաստանի, Ռուսաստանի, ԱՄՆ-ի և Հարավային Օսիայի մասնակցությամբ: Կոնսուլտացիաներն ընթանում են ՄԱԿ-ի, Եվրամիության և ԵԱՀԿ-ի հովանու ներքո:

ՌԴ ԱԳՆ-ում նշել են, որ Ժնևի քննարկումների ընթացքում Մոսկվան հավաստել է տարածաշրջանի անվտանգության վերաբերյալ համաձայնագրերի երաշխավոր հանդես գալու պատրաստակամությունը:

«Ժնևյան քննարկումների գլխավոր խնդրի՝ Աբխազիայի և Հարավային Օսիայի կայուն անվտանգության ապահովման ուղիների քննարկման ընթացքում Սուխումի և Ցխինվալի ներկայացուցիչները հանդես են եկել ուժի չկիրառման մասին Թբիլիսիի հետ իրավաբանորեն պարտավորեցնող համաձայնագրերի պատրաստման աշխատանքն արագացնելու օգտին,- նշել են ՌԴ ԱԳՆ-ում:- Ռուսական կողմը հավաստել է տարածաշրջանի անվտանգության վերաբերյալ պայմանավորվածությունների երաշխավոր հանդես գալու պատրաստակամությունը»:

«Կոնսուլտացիաների շարունակումը պլանավորված է 2015 թվականի մարտին»,- հայտնել են նախարարությունում: