Հասարակության շրջանում խուճապն ավելի նպաստեց դրամ-դոլար սպեկուլյացիային

Հասարակության շրջանում խուճապն ու ֆինանսական թերի գիտելիքները նպաստեցին, որ դրամ-դոլար սպեկուլյացիան հասնի բարձր մակարդակի, որի արդյունքում մի շարք կազմակերպություններ շահեցին, իսկ բնակչությունը' տուժեց: Նման տեսակետ հայտնեց ՀՀԿ պատգամավոր, ԱԺ ֆինանսավարկային և բյուջետային հարցերի մշտական հանձնաժողովի նախագահ Գագիկ Մինասյանը դեկտեմբերի 19-ին հրավիրված ասուլիսում:

«Հասարակության մոտ խուճապի բարձրացումը և ֆինանսական շուկային թերի տիրապետումը նաև հանգեցրեց այս իրավիճակին»,- «Արմենպրես»-ի փոխանցամամբ' ասաց Գագիկ Մինասյանը' հավելելով, որ Կենտրոնական բանկն այդ օրերինշատ ճիշտ քաղաքականություն է որդեգրել, ինչ վերաբերում է բանկերին' նրանք ամուր են և կարողանում են «բռնել» բոլոր սթրես-թեստերը:

«Նման իրավիճակներն անխուսափելի են և պարբերաբար տեղի են ունեցել: Այն, ինչ կատարվում է Հայաստանում փոխարժեքի տատանման և փոփոխման առնչությամբ, հայաստանյան ծագում չունի. դոլարն ուժեղանում է, և մնացած բոլոր արժույթների գինն ընկնում է: Բացի այդ, Ռուսաստանում տեղի ունեցող գործընթացները, որոնց հետևանքով առկա է ռուբլու էական արժեզրկում և նավթի գնի կտրուկ նվազում և Հայաստանի պես փոքր ու բաց տնտեսություն ունեցող երկրի վրա ֆինանսական փոփոխությունները պետք է ազդեցություն ունենային: Բնական զարգացումներին զուգահեռ կար նաև խուճապ, շատ արագ փոփոխվող իրավիճակում մարդիկ սխալ էին կողմնորոշվում, ինչն էլ հանգեցրեց իրավիճակի ավելի սրմանը: Ինչ վերաբերում է ԿԲ-ին, ապա այն շատ ճիշտ վարվեց և շատ ճիշտ քաղաքականություն էր որդեգրել»,- ասաց Մինասյանը:

Միջազգային շուկայում դոլարի արժևորումը նպաստել էր Հայաստանում դրամի անկմանը, ինչի հետևանքով բանկերում և փոխանակման կետերում դոլարի գինը բարձրացել էր մինչև 580 դրամ: Դեկտեմբերի 18-ից դրամն արժևորվում է և այս պահին բանկերում և փոխանակման կետերում մեկ դոլար կարելի է գնել միջինում 464 դրամով: Բանկերը եվրոն գնում են միջինում 531.22 դրամով և վաճառում' 582.81 դրամով: Եվրոյի համար նվազագույն գինը 554 դրամ է, իսկ առավելագույնը' 605 դրամ:

Երեկվա համեմատ 0.47 դրամով բարձրացել է ռուբլու փոխարժեքը: Բանկերը ռուբլին առնում են միջինում 7.04 դրամով և վաճառում' 8.21 դրամով: