Թուրքական բանակում սպանված Սևակի գործը կքննվի զրոյից

Թուրքիայում զինվորական ծառայությունն իրականացնելու ժամանակ ծառայակցի կողմից սպանված հայ զինվոր Սևակ Բալըքչըի գործով Դիարբեքիրի օդուժի երկրորդ ռազմական դատարանում տեղի է ունեցել հերթական դատական նիստը: Ինչպես հաղորդում է «Արմենպրես»-ը, այս մասին տեղեկացնում է թուրքական Demokrathaber.net-ը:

2011 թվականի ապրիլի 24-ին սպանված Բալըքչըի հայրը' Կարապետ Բալըքչըն, նիստի ժամանակ նշել է, որ հավատում է որդուն մտադրված սպանելու վարկածին: Բացի այդ, նա հիշեցրել է, որ դատավարության ժամանակ վկաների նկատմամբ ճնշում է գործադրվել: Նա պահանջել է նաև հետաքննել և պարզել, թե ով է իր որդուն դիմելով ասել. «Քեզ սպանելու եմ, չաղլիկ, սա քո կերած վերջին բլիթն է»:

Բալըքչըին սպանելու համար 4 տարի 5 ամիս և 10 օր ազատազրկման դատապարտված, սակայն պատիժն ազատության մեջ կրող թուրք զինվոր Քըվանչ Աղաօղլուի ցուցմունքը լսելուց հետո դատարանը որոշում է կայացրել գործը քննել ամենասկզբից: Բալըքչըի գործով հերթական դատական նիստը նշանակվել է փետրվարի 27-ին:

Սևակ Շահին Բալըքչին թուրքական բանակում սպանվել է 2011 թ. ապրիլի 24-ին, երբ նրա զորացրմանը մնացել էր ընդամենը 23 օր: Զորամասի հրամանատարությունը սպանությունից անմիջապես հետո հայտարարել էր, որ այն տեղի է ունեցել «ծառայակից ընկերոջ հետ կատակելու ժամանակ' պատահաբար արձակված գնդակից»: Սևակի ծնողները պնդում են, որ նրան սպանել են հայ լինելու համար: