Ճապոնիայի կառավարությունը հավանություն է տվել ռեկորդային չափերի ռազմական բյուջեին

Ճապոնիայի կառավարությունը հունվարի 14-ին հավանություն է տվել 2015 ֆինանսական տարվա (2015 թվականի ապրիլ-2016-ի մարտ) ռեկորդային մասշտաբի պետական բյուջեի նախագծին, տեղեկացնում է «Արմենպրես»-ը: Այն կազմում է 96,34 տրիլիոն իեն (մոտավորապես 818 մլրդ դոլար), ինչն ավելի քան 3,4 մլրդ դոլարով գերազանցում է ընթացիկ ֆինանսական տարվա բյուջեն:

Նոր բյուջեի նախագիծը նախատեսում է ռազմական ծախսերի աճ: Դրանք կկազմեն երկրի համար ռեկորդային 4,98 տրիլիոն իեն (41,7 մլրդ դոլար):

Բացի այդ, նոր պետբյուջեի նախագիծը նախատեսում է սոցիալական կարիքների համար հատկացումների ավելացում (ավելի քան 263 մլրդ դոլար), ինչպես նաև վերականգնվող էներգետիկայի զարգացմանն ուղղված ծախսերի աճ:

Նախարարների կաբինետի կողմից հաստատվելուց հետո պետբյուջեի նախագիծը կուղարկվի խորհրդարանի քննարկմանը:

ՏԱՍՍ-ը հիշեցնում է, որ 2014 թվականի հուլիսի սկզբին Ճապոնիայի կառավարությունն ընդունել է բանաձև, որի համաձայն՝ Երկրորդ համաշխարհային պատերազմի ավարտից հետո առաջին անգամ երկրի զինված ուժերը կարող են գործողությունների մասնակցել արտասահմանում: Ըստ այդ փաստաթղթի՝ երկրի Սահմանադրության մեջ կատարվում են փոփոխություններ. այսուհետև Ճապոնիայի ինքնապաշտպանության ուժերը կարող են կիրառվել հավաքական պաշտպանության շրջանակներում բարեկամ պետություններին պաշտպանելու համար, նույնիսկ եթե երկիրն ինքը հարձակման չի ենթարկվում: