Մասնագետները ձեռնամուխ են եղել AirAsia-ի կործանված օդանավի սև արկղերի վերծանմանը

Ինդոնեզացի մասնագետները հունվարի 14-ին ձեռնամուխ են եղել այն ինքնագրիչների վերծանմանը, որոնք հայտնաբերվել են Ճավայի ծովում AirAsia Indonesia ավիաընկերության ինքնաթիռի կործանման վայրում, վերծանման տվյալները կարող են ստացվել արդեն մեկ շաբաթ հետո, տեղեիացնում է «Արմենպրես»-ը:

«Մեկ շաբաթ հետո մենք կարող ենք ստանալ վերծանման տվյալները»,- Reuters գործակալությանը տված հարցազրույցի ժամանակ հայտարարել է Ինդոնեզիայի Տրանսպորտի անվտանգության ազգային կոմիտեի գլխավոր քննիչ Մարջոնո Սիսվոսուվառնոն:

ՌԻԱ Նովոստին հիշեցնում է, որ այս շաբաթ ավելի վաղ ինդոնեզացի փրկարարներին հաջողվել է հայտնաբերել և ջրից դուրս բերել կործանված ինքնաթիռի երկու ինքնագրիչները, ինչից հետո դրանք հասցվել են երկրի մայրաքաղաք Ջակարտա՝ ցուցմունքներ ստանալու համար: Փրկարարների տվյալներով՝ երկու ինքնագրիչներն էլ գտնվում են լավ վիճակում: AirAsia Indonesia հանրանավի կործանման պատճառների հետաքննության ամփոփիչ արդյունքները կհրապարակվեն մեկ տարուց ոչ շուտ:

Հանրանավն Ինդոնեզիայի Սուրաբայա քաղաքից Սինգապուր է մեկնել դեկտեմբերի 28-ի վաղ առավոտյան և թռիչքից մեկ ժամ չանցած կորել է ռադարների էկրաններից՝ չտալով աղետի ազդանշաններ: Ինքնաթիռում եղել է 162 մարդ (ճնշող մեծամասնությամբ՝ Ինդոնեզիայի քաղաքացիներ), նրանք բոլորը զոհվել են: Այս պահին Սուրաբայա են հասցվել աղետի 48 զոհերի մարմինները: Այնտեղ աշխատում են ավելի քան 200 դատաբժշկական փորձագետ, և այժմ ճանաչվել է 32 զոհված: