Իրանը սադրանք է որակել Մուհամեդ մարգարեի ծաղրանկարների նոր հրապարակումը

Իրանը խստիվ դատապարտել է ֆրանսիական Charlie Hebdo երգիծական թերթի կողմից Մուհամեդ մարգարեի ծաղրանկարների նոր հրապարակումը:

Ինչպես տեղեկացնում է «Արմենպրես»-ը՝ հղում անելով «Թասնիմ» գործակալությանը, Իսլամական Հանրապետության ԱԳ նախարարության պաշտոնական ներկայացուցիչ Մարզիե Աֆհամը դա գնահատել է որպես հերթական սադրանք:

«Մենք դատապարտում ենք ֆրանսիական շաբաթաթերթի սադրիչ քայլը, քանի որ այն հարվածում է մուսուլմանների զգացմունքներին,-հայտարարել է Աֆհամը Թեհրանում կայացած մամուլի ասուլիսում: Արևմուտքում չարաշահում են խոսքի ազատությունը, ինչն անթույլատրելի է»:

Ինչպես արդեն հաղորդվել է, Փարիզի Charlie Hebdo երգիծական հանդեսի նոր համարը հունվարի 14-ին հայտնվել է ամբողջ Ֆրանսիայի թերթի կրպակների վաճառասեղաններին: Դա հրատարակության առաջին թողարկումն է հունվարի 7-ին տեղի ունեցած ողբերգական իրադարձություններից հետո, երբ թերթի խմբագրության շենքում իրականացված ահաբեկչական գործողության հետևանքով սպանվեց 12 մարդ: Հունվարի 14-ի 1178-րդ թողարկման շապիկին Charlie Hebdo-ի ստեղծագործական կոլեկտիվը որոշել է զետեղել Մուհամեդ մարգարեի հեթական ծաղրանկարը: Նկարում կանաչ ֆոնի վրա պատկերված է մորուքավոր մարդ, որը ներկայացնում է իսլամի հիմնադրին:

Ծաղրանկարի հերոսը տխուր դեմք ունի, նրա այտով արցունք է գլորվում: Նա ձեռքին բռնել է ցուցանակ՝ «Ես Շառլին եմ» (Je suis Charlie) կարգախոսով, որը վերջին օրերին համաշխարհային հռչակ է ձեռք բերել: Շապիկը պսակում է «Ամեն ինչ ներված է» վերտառությունը, հաղորդել է ՏԱՍՍ-ը: