Երվանդ Զախարյանը չբացառեց, որ էլեկտրաէներգիա արտադրողները կդիմեն ՀԿԾՀ-ին սակագնի վերանայման համար

Դրամի արժեզրկման պարագայում չի բացառվում, որ էլեկտրաէներգիա արտադրող ընկերությունները դիմեն Հանրային ծառայությունները կարգավորող հանձնաժողովին և առաջարկեն վերանայել էլեկտրաէներգիայի սակագինը: Լրագրողների հետ հանդիպմանը ՀՀ էներգետիկայի և բնական պաշարների նախարար Երվանդ Զախարյանն ընդգծեց, որ դա իր կողմից տարօրինակ չի դիտվի, սակայն վստահեցրեց, որ կառավարությունը կփորձի լուծում տալ խնդրին: «Ֆինանսական դաշտի յուրաքանչյուր փոփոխության պայմաններում համապատասխան փոփոխություններ արվում են սակագների առումով: Դրամի արժեզրկման հետ կապված բնական է, որ էլեկտրաէներգիա արտադրող ընկերություններն ու բաշխիչ ցանցերը վնասներ են կրելու: Ես տարօրինակ չէի համարի, եթե ընկերություններից մեկը ներկայացներ հաշվարկներ սակագների վերանայման հետ կապված: Դա սպասելի է այսօր: Բայց միևնույն ժամանակ, ես պատասխանատու կերպով հայտարարում եմ, որ ՀՀ նախագահի և կառավարության դիրքորոշումն է' անել ամեն ինչ, որ սակագների բարձրացման հետ կապված այս տարի խնդիր չունենանք»,- «Արմենպրես»-ի հաղորդմամբ' ասաց Զախարյանը: Նա շեշտեց, որ կարվի հնարավորինս, որպեսզի բնակչությունը լրացուցիչ բեռ չստանձնի:

Հանրային ծառայությունները կարգավորող հանձնաժողովը 2014 թվականի հունիսի 3-ին սկսեց էլեկտրաէներգիայի սակագնի վերանայման գործընթաց: Հուլիսի 1-ին կայացած նիստում ՀԾԿՀ-ն ընդունեց որոշում՝ համաձայն որի' օգոստոսի 1-ից 3.85 դրամով բարձրացվեց էլեկտրաէներգիայի սակագինը։ Քաղաքացիական որոշ զանգվածներ փորձեցին բողոքի ակցիաների միջոցով պայքարել որոշման ընդունման դեմ, սակայն ապարդյուն։ Այդ ժամանակ պատկան մարմինները հայտարարեցին, որ 2015 թվականի ընթացքում էլեկտրաէներգիայի սակագինը չի փոխվի: