Դինքի գործով ցմահ ազատազրկված Յասին Հայալը նոր ցուցմունք է տվել

Հրանտ Դինքի սպանության գործով կասկածյալ Յասին Հայալը որպես վկա ցուցմունք է տվել:

Ինչպես հաղորդում է «Արմենպրես»-ը՝ վկայակոչելով «Ակոս» պարբերականը, Հայալին հարցաքննել է Դինքի գործի քննությունը ստանձնած դատախազ Գյոքալփ Քյոքչուն:

Յասին Հայալը, ով այժմ ցմահ ազատազրկված է «Հրանտ Դինքին ծրագրված սպանության դրդելու» մեղադրանքով, շուրջ երեք ժամ ցուցմունք տալուց հետո վերադարձվել է կալանավայր:

Հրանտ Դինքը սպանվել է 2007 թվականի հունվարի 19-ին՝ «Ակոս»-ի խմբագրության առջև զինված հարձակման արդյունքում:

2012 թվականի հունվարի 17-ին դատարանի որոշմամբ՝ Դինքի սպանության կազմակերպիչ Յասին Հայալը ցմահ բանտարկության դատապարտվեց, անմիջական հանցագործ Օգյուն Սամասթը՝ 22 տարվա ազատազրկման:

2014 թվականի հոկտեմբերին Ստամբուլի ծանր հանցագործությունների գործերով 5-րդ դատարանը որոշում է կայացրել Հրանտ Դինքի սպանության գործով դատավարությունն սկսել զրոյից:

Այս անգամ բոլոր ամբաստանյալներին կառաջադրվի «հանցավոր խմբավորման ստեղծման և կառավարման կամ դրանում մասնակցություն ունենալու» մեղադրանք: Բացի այդ, Դինքի սպանության ժամանակ բարձր պաշտոններ զբաղեցրած 9 անձանց, այդ թվում' Ստամբուլի նախկին ոստիկանապետ Ջելալեթին Ջերահի նկատմամբ դատական գործեր հարուցելու կապակցությամբ որոշումներ են ընդունվել: