Արմեն Մուրադյանը վերջակետ դրեց փոքրիկ Սերյոժայի հիվանդասենյակ մուտքն արգելելու խոսակցություններին

ՀՀ առողջապահության նախարար Արմեն Մուրադյանը վերջակետ դրեց խոսակցություններին, թե ինչու Գյումրիում սպանված Ավետիսյանների ընտանիքի փոքրիկի հարազատներին չէին թույլատրում մտնել հիվանդասենյակ, իսկ ռուս լրագրողները մուտք էին գործում: Վեց ամսական Սերյոժա Ավետիսյանի հիվանդասենյակը գտնվել է մշտական վերահսկողության ներքո, և ռուս լրագրողները նույնպես երեխային նկարահանել են ապակու ետևից: «Այն ուշադրությունը, որին արժանացել էր այդ երեխան, միանշանակ պարզ և բացատրելի էր: Ներհիվանդանոցային այցելությունները գտնվում էին խիստ վերահսկողության ներքո և ես այսօր զավեշտալի եմ համարում այդ հարցը: Մեր ամբողջ պայքարն ուղղված էր երեխայի կյանքը փրկելուն»,- «Արմենպրես»-ի հաղորդմամբ՝ ասաց Մուրադյանը:

Նրա խոսքով՝ իրենց պայքարը նաև լրատվամիջոցների հետ այն էր, որ մեկ աղբյուրից օգտվեն ռեպորտաժները պատրաստելիս ու մշտապես չհերթապահեն հիվանդասենյակի մուտքի մոտ, չփորձեն տեսախցիկներով մուտք գործել սենյակ: