Ադրբեջանն 8 կետով նահանջ է գրանցել ավտորիտար վարչակարգերի մեջ

The Economist Intelligence Unit's (EIU) կազմակերպությունը հրապարակել է 2014 թվականի ժողովրդավարության ինդեքսը (Index of Democracy 2014), որում, նախորդ տարվա համեմատ, Ադրբեջանը ավտորիտար երկրների մեջ 8 կետով նահանջ է գրանցել:

Ինչպես հաղորդում է «Արմենպրես»-ը, ժողովրդավարության ինդեքսը հիմնվում է 5 կատեգորիայի վրա' ընտրական գործընթաց և բազմակարծություն, քաղաքացիական ազատություններ, կառավարության գործունեություն, քաղաքական գործընթացներում մասնակցություն, քաղաքական մշակույթ: Կազմակերպությունն ինդեքսը կազմել է աշխարհի 167 երկրներում այդ կատեգորիաներով կատարած հետազոտության հիման վրա՝ սահմանելով 10-բալանոց համակարգ:

Առաջին տասնյակում տեղ են զբաղեցրել Նորվեգիան, Շվեդիան, Իսլանդիան, Նոր Զելանդիան, Նիդեռլանդները, Դանիան, Ֆինլանդիան, Շվեյցարիան և Ավստրալիան: Ցուցակի վերջին տեղում նշված է Հյուսիսային Կորեան:

167 երկրի մեջ Ադրբեջանը նշված է 148-րդ տեղում: Անցյալ տարի այդ ցուցակում Ադրբեջանը 140-րդ տեղում էր: Այս տարի այդ երկիրը 8 կետով նահանջ է գրանցել' համապատասխանաբար 67 և 35 կետերով հետ մնալով Հայաստանից և Վրաստանից:

Ինդեքսի 10-բալանոց սանդղակում Ադրբեջանը ընտրական համակարգի և բազմակարծության գնահատականներով ստացել է 0,50 միավոր, կառավարության գործունեության գնահատմամբ' 2,14 միավոր, քաղաքական մասնակցության գնահատմամբ' 3,33 միավոր, քաղաքական մշակույթի գնահատմամբ' 3,75 միավոր և քաղաքացիական ազատությունների գնահատմամբ' 4,41 միավոր: