Թաիլանդի խորհրդարանը նախկին վարչապետ Յինգլաք Չինավաթին իմփիչմենտի ենթարկելու որոշում է ընդունել

Թաիլանդի Ազգային օրենսդիր ասամբլեան (խորհրդարանը) հունվարի 23-ին որոշում է ընդունել իմփիչմենտի ենթարկելու երկրի նախկին վարչապետ Յինգլաք Չինավաթին: Այն ենթադրում է քաղաքական գործունեության հնգամյա արգելք, տեղեկացնում է «Արմենպրես»-ը:

Չինավաթի պաշտոնազրկման օգտին, որը Թաիլանդի կառավարությունը գլխավորել է 2011 թվականի հուլիսից մինչև 2014 թվականի մայիսը, քվեարկել է խորհրդարանի, որի կեսը բաղկացած է ուժային կառույցների նախկին և գործող ներկայացուցիչներից, 220 պատգամավորներից 190-ը: Ընթացակարգն սկսվել է Ազգային հակակոռուպցիոն հանձնաժողովի հետաքննության արդյունքներն օրենսդիր ժողովին հանձնվելուց հետո, որը Չինավաթին մեղավոր է ճանաչել գյուղատնտեսական արտադրողներից բրնձի գրավային գնման ծրագիրն իրականացնելիս ցուցաբերած անփութության համար:

Հակակոռուպցիոն հանձնաժողվի տվյալներով՝ 2011-ից մինչև 2014 թվականը պետական ծրագրի իրագործումը երկրին հասցրել է 518 միլիարդ բաթի (16,9 միլիարդ դոլար) չափով վնաս: Կառավարությունը գյուղացիներից բրինձը գնել է շուկայականից էապես բարձր գներով և ստանձնել է այն արտասահմանում վաճառելու պարտավորություններ: Մինչդեռ, ինչպես նշում է ՏԱՍՍ-ը, այս մշակաբույսի համաշխարհային գների անկման պայմաններում դրանք կատարելը չափազանց բարդ է եղել: Թաիլանդը զրկվել է բրնձի արտահանման համաշխարհային առաջատարի կարգավիճակից, իսկ պետական պահեստներում ապրանքի կուտակումներ են առաջացել: Բացի դրանից, ծրագիրն իրագործելիս բացահայտվել են կոռուպցիայի և խարդախության դեպքեր: