Էդվարդ Նալբանդյանը խոսել է Ադրբեջանի սադրիչ գործողություններին միջազգային կառույցների արձագանքի մասին

Հայաստանը հայ-ադրբեջանական սահմանին և ղարաբաղա-ադրբեջանական շփման գծում լարվածություն ստեղծելու և սադրիչ գործողությունների մասին տեղյակ է պահել ՀԱՊԿ-ին, ԵԱՀԿ-ին, Եվրոպայի խորհրդին, ՄԱԿ-ի տարբեր կառույցներին: Հունվարի 26-ին այս մասին լրագրողների հետ հանդիպմանն ասաց ՀՀ ԱԳ նախարար Էդվարդ Նալբանդյանը՝ անդրադառնալով հարցին, թե Հայաստանը ՀԱՊԿ-ին տեղյակ պահե՞լ է վերջին օրերին ադրբեջանական կողմից Հայաստանի սահմանների նկատմամբ ոտնձգության դեպքերի մասին: «Մենք մշտապես անհապաղ տեղյակ ենք պահում, երբ լինում են սադրանքներ, ինչ-որ գործողություններ, որոնք կարող են ապակայունացնել իրավիճակը հակամարտության գոտում»,- «Արմենպրես»-ի հաղորդմամբ՝ նշեց Նալբանդյանը:

Անդրադառնալով դիտարկմանը, թե ադրբեջանական կողմի սադրիչ գործողություններին ոչ միշտ է արձագանք լինում ՀՀ ԱԳ նախարարության կողմից՝ Նալբանդյանն ընդգծեց, որ այս տարվա առաջին արձագանքը եղել է հունվարի 3-ին: «Դրանից հետո եղել են միջազգային արձագանքները, արձագանքել է նաև ՀԱՊԿ գլխավոր քարտուղարը»,- մանրամասնեց նախարարը:

Անդրադառնալով հարցին, թե բավարարում է հայկական կողմին ՀԱՊԿ արձագանքը՝ Էդվարդ Նալբանդյանը նկատեց, որ հարկավոր է հաշվի առնել այն հանգամանքը, որ ՀԱՊԿ-ն բազմանդամ կառույց է, և համապատասխան հայտարարությունները պետք է համաձայնեցվեն, ինչն այնքան էլ պարզ գործընթաց չէ: «ՀԱՊԿ-ի կողմից արվել են բազմաթիվ հայտարարություններ, որպիսիք չեն եղել այլ կառույցների կողմից: Դուք գիտեք, որ ՀԱՊԿ վերջին գագաթնաժողովի ժամանակ, որը կայանում է անդամ երկրների ղեկավարների մասնակցությամբ, Լեռնային Ղարաբաղի համակարտության վերաբերյալ հայտարարություն է ընդունվել: Եթե դուք վերցնեք և նայեք այդ հայտարարությունը, կտեսնեք, որ այն մեր դիրքորոշումն է, որն ընդունելի է նաև ՀԱՊԿ անդամ մյուս երկրների ղեկավարների համար: Այնպես որ, այստեղ քննադատել մեկ կառույցի, ասել այսպես է արել կամ չի արել, ճիշտ չէ: Պետք չէ այդպես պարզունակ մոտենալ հարցին, թե մենք դիմեցինք, ներկայացրեցինք, իրենք էլ անմիջապես պետք է հայտարարություն անեն: Վերջին շրջանում տասնյակ այդպես սադրանքներ են եղել: Եթե ամեն մի սադրանքին հայտարարություն արվի, այսպես ասած' «ուղարկել ենք 1050-րդ բողոքի նոտան», իսկ հետո՞: Այսինքն, պետք է ռեալ պատկերա ցնեք, թե ինչումն է կայանում տարվող դիվանագիտական աշխատանքը, որը կոչված է թույլ չտալ, որ այս գործողություններն ավելի բարդ իրավիճակի հանգեցնեն, որպեսզի ստեղծվեն համապատասխան պայմաններ բանակցությունների շարունակման համար»,- նշեց նախարարը:

Նալբանդյանի խոսքով' պատահական չէր, որ ԱՄՆ-ն, Ֆրանսիան և Ռուսաստանն առանձին գագաթնաժողովներ կազմակերպեցին Հայաստանի և Ադրբեջանի նախագահների մակարդակով: Նա հիշեցրեց, որ այդ հանդիպումների ժամանակ Ալիևը հայտարարում էր, որ հակամարտությունը պետք է կարգավորվի խաղաղ ճանապարհով և բանակցությունների միջոցով: «Սակայն, միգուցե Ալիևի հիշողությունը շատ կարճ է. հենց նա վերադառնում է Բաքու, մոռանում է իր հայտարարությունների մասին և իր շրջապատում հայտարարում է, թե ինքը 90 տոկոսից ավել հեղինակություն ունի, Ադրբեջանում մամուլն ազատ է և այլն»,- եզրափակեց նախարար Նալբանդյանը: