Իրանը կշարունակի խաղաղ ատոմային էներգետիկայի զարգացումը. Ռոուհանի

Իրանը մտադիր է «շարունակել միջուկային տեխնոլոգիաների ներդրումն իր խաղաղ ատոմային էներգետիկան զարգացնելու համար»: Ինչպես տեղեկացնում է «Արմենպրես»-ը՝ հղում անելով ԻՍՆԱ գործակալությանը, այս հայտարարությունն արել է Իրանի նախագահ Հասան Ռոուհանին

Նրա խոսքով՝ իրանական միջուկային խնդրի լուծումն «բացառապես քաղաքական հարթությունում է», և «այդ լուծումը պահանջում է երկու կողմերի քաղաքական կամքը», որոնք բանակցություններ են վարում այդ հարցի շուրջ: «Մենք, իհարկե, ձգտում ենք որքան կարելի է ավելի արագ լուծել այդ խնդիրը»,- ասել է Ռոուհանին Պորտուգալիայի արտաքին գործերի նախարար Պույ Մաշետեի հետ ունեցած հանդիպման ընթացքում:

ՏԱՍՍ-ի հաղորդմամբ՝ նախագահը կրկին հավաստել է, որ իրանական միջուկային ծրագիրը խաղաղ բնույթ է կրում:

Ինչ վերաբերում է Իրանի և «վեցյակի» (ԱԽ-ի հինգ մշտական անդամները և Գերմանիան) բանակցությունների ընթացքին, ինչպես նաև Իսլամական Հանրապետության դեմ պատժամիջոցների նոր փաթեթին հավանություն տալու Միացյալ Նահանգների Կոնգրեսի փորձերին, նախագահը նշել է, որ «Իրանի վրա ճնշումն անիմաստ է»: «Ինչպես ճնշումը, այնպես էլ պատժամիջոցները երկսայրի սուր են, որոնք վնաս կհասցնեն երկու կողմերին»,- ընդգծել է նա: