Apple-ը խանութներում չհրկիզվող պահարաններ կտեղադրի ոսկե Apple Watch-երը պահելու համար

Aplle ընկերությունը հատուկ չհրկիզվող պահարաններ կտեղադրի իր Apple Watch ֆիրմային խանութներում՝ ոսկե պատյանով Apple Watch խելացի ժամացույցները պահելու համար: Այս մասին, ինչպես տեղեկացնում է «Արմենպրես»-ը, հաղորդել է 9to5Mac հրատարակությունը՝ վկայակոչելով իրազեկ աղբյուրները:

Apple Watch ժամացույցները, որոնց վաճառքը շուկայում սպասվում է ապրիլին, մատչելի կլինեն երեք հիմնական վերափոխակներով՝ Apple Watch Sport մոդելը, որն աչքի է ընկնում խոնավա- և փոշեպաշտպանությամբ, Apple Watch հիմնական վերափոխակը՝ շափյուղյա ապակուց էկրանով և պողպատե պատյանով, և Apple Watch Edition-ը՝ ոսկե պատյանով, ինչպես նաև շափյուղյա ապակիով:

Հրատարակության տվյալներով՝ Apple Watch Edition-ի պլանավորված բարձր գնի պատճառով ընկերությունը մտադիր է ձեռնարկել անվտանգության միջոցներ՝ ոսկերչական խանութներում կիրառվող միջոցների օրինակով: Ժամացույցների նմուշները կցուցադրվեն առևտրական սրահում, սակայն գիշերն Apple-ի աշխատակիցները դրանք կպահեն հատուկ անկիզելի պահարաններում: Դրանցում կպահվեն նաև վաճառքի համար նախատեսված սարքերի պաշարները:

Առայժմ Apple-ը հայտարարել է սարքի մեկնարկային գինը՝ 349 դոլար: Սակայն, զանգվածային լրատվամիջոցների տվյալներով՝ Apple Watch Sport մոդելի գինը կաճի մինչև 500 դոլար, մինչդեռ Apple Watch Edition-ի արժեքը կարող է հասնել 4-5 հազար դոլարի: