Ադրբեջանագետը քաղաքական ուժերին կոչ է անում զերծ մնալ ներքաղաքական ցնցումներից

Առաջիկայում Ադրբեջանը հայ-ադրբեջանական սահմանին և ղարաբաղա-ադրբեջանական շփման գծին իրավիճակն ապակայունացնելու նոր սադրանքների է դիմելու: Փետրվարի 7-ին լրագրողների հետ հանդիպմանը նման տեսակետ հայտնեց ադրբեջանագետ Գրիգորի Այվազյանը: «Պետք չէ ակնկալել, որ մոտակա ժամանակահատվածում Ադրբեջանը կդիմի լարվածությունը թուլացնելու քայլերի: Ընդհակառակը, ես կարծում եմ, որ առաջիկայում նրանք նոր սադրանքների են դիմելու, և նման պայմաններում մենք պետք է զգոն լինենք: Մենք բոլորս պետք է առավել քան զգոն լինենք սպասվող վտանգի առջև: Ինչպես երեկ շատ ճիշտ ասել է Հայաստանի պաշտպանության նախարարի մամուլի խոսնակը, հայ-ադրբեջանական սահմանին այս պահին «դանդաղ պատերազմ» է ընթանում, սակայն այդ «դանդաղ պատերազմն» ամեն պահի կարող է վերածվել լայնամասշտաբ և արյունալի պատերազմի: Նման պայմաններում մենք պետք է լինենք առավելագույնս զգոն, պետք է լինենք միասնական և զերծ մնանք ներքաղաքական ցնցումներից, քանի որ նրանք ուշադրությամբ հետևում են մեր երկրի ներքաղաքական զարգացումներին, և մեր երկրի ներսում ցանկացած ցնցում կարող է նրանց հիմք տալ, որ նրանք դիմեն նոր սադրանքների»,- «Արմենպրես»-ի հաղորդմամբ՝ նշեց նա:

Ադրբեջանագետը նկատեց, որ Ադրբեջանը, չբավարարվելով ղարաբաղա-ադրբեջանական շփման գծին իրավիճակն ապակայունացնելու փորձերով, արդեն սկսել է սադրանքների դիմել հայ-ադրբեջանական սահմանին: «Սա Հայաստանին կանխարգելիչ հարվածներ հասցնելու հիմքեր է տալիսլ՝ պարտադրելով հակառակորդին խաղաղություն: Այն, որ հայկական կողմը դիմում է պատժիչ գործողությունների, Ադրբեջանի վրա քիչ ազդեցություն է ունենում, որովհետև նրանք առաջին գիծ են տանում հիմնականում ազգային փոքրամասնությունների ներկայացուցիչների: Սրանով Ադրբեջանը երկու խնդիր է լուծում. Ապակայունացնում է իրավիճակը սահմանին և նպաստում է երկրից ազգային փոքրամասնությունների արտագաղթին, քանի որ փոքրամասնությունները Լեռնային Ղարաբաղում ոչինչ չեն կորցրել և շահագրգռված չեն Լեռնային Ղարաբաղը վերադարձնելու հարցում»,- ընդգծեց ադրբեջանագետը:

Նա այն կարծիքին է, որ ներկայումս հայ-ադրբեջանական սահմանին ստեղծված իրավիճակը իրավական հիմքեր է տալիս պաշտոնական աջակցության համար դիմել ՀԱՊԿ-ին՝ ընդգծելով, որ Ադրբեջանը դեռևս շարունակելու է սադրանքների դիմել: