Սերժ Սարգսյանը չգիտի՞, որ Մինսկի խմբի համանախագահների ինստիտուտը ոչ թե 20, այլ 15 տարեկան է

Սերժ Սարգսյանը երեկ հիշել է, որ ԵԱՀԿ Մինսկի խումբն արդեն 20 տարի է ինչ գործում է, և պատկերացնո՞ւմ եք' ոչ ավել, ոչ պակաս, շնորհավորական ուղերձ է հղել «Մինսկի գործընթացի 20-ամյակի կապակցությամբ»: Բայց պատկերացրեք, Սարգսյանն իր ուղերձը հղել է «ԵԱՀԿ Մինսկի խմբի համանախագահող երկրների ղեկավարներին' ՌԴ նախագահ Դմիտրի Մեդվեդևին, ԱՄՆ-ի նախագահ Բարաք Օբամային և Ֆրանսիայի նախագահ Նիկոլա Սարկոզիին»: Ըստ երևույթին, Սարգսյանի խորհրդատուները կամ նրան լավ չեն բացատրել Մինսկի խմբի և համանախագահների ինստիտուտի տարբերությունը, կամ էլ' իրենք էլ չգտեն, կամ գուցե արդեն մոռացել են, որ այդ երկու ինստիտուտները ստեղծվել են տարբեր ժամանակներում: Բանն այն է, որ 20 տարի առաջ ստեղծվել է Մինսկի խումբը, իսկ համանախագահության ինստիտուտը ներդրվել է դրանից 5 տարի անց: Այսպես, 1992 թվականին ԵԱՀԿ-ի (այն ժամանակ' ԵԱՀԽ), նախարարների խորհուրդը համաձայնություն է տվել ստեղծել Մինսկի խումբ, որպես ԼՂ հիմնախնդրի կարգավորման համար բանակցությունների ֆորմատ: Հայաստանը, Ադրբեջանը, Բելառուսը, Չեխիան, Սլովակիան, Ֆրանսիան, Գերմաիան, Իտալիան, ՌԴ-ն, Շվեդիան, Թուրքիան և ԱՄՆ-ն այն ժամանակ իրենց համաձայնություն էին տվել մասնակցել այդ կոնֆերանսին: Իսկ ահա Մինսկի խմբի համանախագահության ինստիտուտը, կազմավորված երեք համանախագահողներից' ԱՄՆ, ՌԴ և Ֆրանսիա, որը գործում է մինչև օրս, ձևավորվել է 1997 -ի հունվարից միայն: Այնպես, որ համանախագհներին Սերժ Սարգսյանը եթե անգամ այդքան մեծ ցանկություն ունի շնորհավորելու, ապա պետք է շնորհավորի ոչ թե 20 այլ 15 ամյակի կապակցությամբ: Իսկ եթե Սարգսյանի ցանկությունը հենց 20-ամյակին է առնչվում, ուրեմն, Սարգսյանը պետք է շնորհավորեր Մինսկի խմբի բոլոր անդամ երկրներին, ի դեպ, այդ թվում նաև Թուրքիային, Գերմանիային, Շվեդիային, Իտալիային և այլն: Մյուս տարօրինակ բան այնն է, որ Սարգսյանը ընդհանրապես շնորհավորական ուղերձ է հղում Մինսկի խմբի գործունեության 20-ամյակի կապակցությամբ: Շնորհավորանք բառն արդեն իսկ տարօրինակ է: Բանն այն է, որ ԵԱՀԿ Մինսկի խումբը զբաղվում է Ղարաբաղյան հակամարտության կարգավորմամբ: Եթե խումբը գործում է արդեն 20 (15), տարի, դա նշանակում է, որ 20 տարի այդ խումբը չի կարողանում կարգավորել ԼՂ հակամարտությունը: Հետևաբար, ենթադրվում է, որ նորմալ մարդը պետք է ոչ թե ուրախանա, որ ԵԱՀԿ Մինսկի խումբն արդեն 20 տարի է գործում է, այլ պետք է առնվազն մտահոգվի, որ խումբը 20 տարի չի կարողանում կարգավորել հակամարտությունը: Իսկ եթե խոսքը այնպիսի անձնավորության մասին է, ով իրեն հռչակել է նախագահ և ստանձնել է (առանց ԼՂՀ իշխանությունների մասնակցության) ԼՂ հարցի կարգավորման բանակցությունները վարելու մենաշնորհը' ուրեմն, այդ մարդն առավել քան մյուսները, ոչ միայն պետք է ուրախանա 20-ամյակով, այլ ամեն ինչ անի, որ խնդիրն իրապես կարգավորվի, և որ Մինսկի խմբի կարիքն էլ այլևս չլինի: Հետևաբար, Սերժ Սարգսյանը կամ սովորական ուղերձ պետք է հղեր Մինսկի խմբի 20-ամյակի կապակցությամբ, կամ' ընդհանրապես չխոսեր: Թե չէ շնորհավորական ուղերձը ոչ ավել, ոչ պակաս նշանակում է, որ Սարգսյանը ուրախ է, որ 20 տարի ԼՂ հակամարտությունը չի կարգավորվում:

Հ.Գ. Ի դեպ, իր շնորհավորական ուղերձում, Սարգսյանը «երախտագիտություն է հայտնել Լեռնային Ղարաբաղի հակամարտության լուծման ուղղությամբ անցած քսան տարիների ընթացքում համանախագահող երկրների և անձամբ այդ երկրների նախագահների կողմից ձեռնարկված հետևողական ջանքերի համար»:

«Ընդգծելով, որ թեև Մինսկի գործընթացի գլխավոր նպատակը' հիմնախնդրի կարգավորումը, դեռևս մնում է չիրագործված, Սարգսյանը նշել է, որ այդուհանդերձ անհնարին է գերագնահատել այն վիթխարի աշխատանքը, որ անցած քսան տարիների ընթացքում իրականացվել է Մինսկի խմբի համանախագահության կողմից' կողմերի դիրքորոշումների մոտեցման, հիմնարար սկզբունքների մշակման, լարվածության լիցքաթափման և խաղաղության պահպանման համար: Սերժ Սարգսյանը վստահեցրել է, որ Հայաստանը, մեծապես շահագրգիռ լինելով հիմնախնդրի հանգուցալուծմամբ, շարունակելու է իր դրական և կառուցողական ներգրավվածությունը Մինսկի խմբի շրջանակներում Լեռնային Ղարաբաղի հակամարտության խաղաղ կարգավորման գործընթացում' ի նպաստ մեր տարածաշրջանի կայունության և անվտանգության, ժողովուրդների լավագույն ապագայի»,- ասված է Սարգսյանի շնորհավորական ուղերձում:

Քրիստինե Խանումյան

«Չորրորդ ինքնիշխանություն»