Կոնգրեսից առաջադրված Գայանե Առուստամյանը թիվ 1 ընտրատարածքում առաջատար է. հարցում

Լուրեր.com կայքը իր ընթերցողների շրջանակում հարցում էր կատարել՝ «Երևանի թիվ 1 ընտրատարածքում առաջադրված թեկնածուներից որի՞ն եք պատրաստվում տալ Ձեր ձայնը» հարցադրմամբ: Հարցվածների մեծամասնությունը ընտրել է Առուստամյան Գայանեյին (ՀԱԿ)։ Վերջինիս օգտին քվեարկել է 1250 մարդ (հարցվածների 49%): Հարցվածներից 670-ը ընտրել են՝ ԱԺ «Ժառանգություն» խմբակցության ղեկավար Ստյոպա Սաֆարյանին (26%): Երրորդ տեղում է ՀՖՖ նախագահ, ՀՀԿ խմբակցության պատգամավոր Ռուբեն Հայրապետյանը, ով հավաքել է 560 ձայն (21%), իսկ տվյալ ընտրատարածքում ինքառաջադրված՝ Արսեն Մանուկյանը հավաքել է 90 ձայն (3%): Հարցմանը մասնակցել է 2570 օգտատեր։

Նշենք, որ ձայների մեծամանսույթունը ստացած Գայանե Առուստամյանը մասնագիտությամբ լրագրող է, Արցախյան ազատամարտի մասնակից, Շահումյանի շրջանի Գաղթուտ գյուղի ջոկատի հրամանատար Բենյամին Տեր-Սարգսյանի դուստրը: 

Հիշեցնենք, որ թիվ 1 ընտրատարածքն ընդգրկում է Ավան վարչական շրջանն ամբողջությամբ և Նոր Նորք վարչական շրջանից՝ Լվովյան փողոցը մինչև Գ. Բորյան փողոցի խաչմերուկն ընկած շենքերը, Գ.Բորյան և Ֆ.Նանսեն փողոցների (զույգ համարներով հասցեները) խաչմերուկից մինչև Գայի պողոտա, Նոր Նորք վարչական շրջանի 2-րդ միկրոշրջանն ամբողջությամբ (Դ.Մալյան, Գայի պողոտա՝ մինչև Ա.Հովհաննիսյան փողոց, Դ. Մալյան և Բագրևանդի փողոցները)։