Նուլանդը Բաքվում խոսել է «ժողովրդավարությունը սպանող» կոռուպցիայի ու գունավոր հեղափոխությունների մասին

ԱՄՆ-ին և Ադրբեջանին անհրաժեշտ է հստակ կառուցվածք ունեցող արդյունավետ երկխոսություն: Ինչպես հաղորդում է «Արմենպրես»-ը՝ վկայակոչելով «Ինտերֆաքս-Ազերբայջան» լրատվական գործակալությունը, այս մասին Բաքվում Ադրբեջանի Նախագահ Իլհամ Ալիևի հետ հանդիպումից հետո լրագրողներին հայտարարել է ԱՄՆ Պետքարտուղարի օգնական Վիկտորյա Նուլանդը: «Ուրախ եմ, որ Նախագահ Իլհամ Ալիևը տվել է իր համաձայնությունը նման ձևաչափի երկխոսություն իրագործելու համար»,- նշել է նա' հավելելով. «Մենք պայմանավորվել ենք, որ շարունակելու ենք երկխոսությունը և ամրապնդելու ենք այն քաղաքացիական հասարակության և ժողովրդավարականացման հարցերով ամերիկա-ադրբեջանական երկխոսության հատուկ ձևաչափ ստեղծելու միջոցով: Դա կդառնա ԱՄՆ-ի և Ադրբեջանի միջև երկկողմանի կառուցվածք, որը զուգահեռ կաշխատի Ադրբեջանի և Եվրոպայի Խորհրդի միջև նման նախաձեռնության հետ»:

Նուլանդն ընդգծել է. «Աշխարհի ուժեղ պետություններն այնտեղ են, որտեղ առկա է պետության և քաղաքացիների միջև բաց երկխոսություն»:

Ամերիկացի պաշտոնյան խոսել է նաև երկրներում գունավոր հեղափոխությունների հնարավորության մասին: «Գունավոր հեղափոխությունների կարիք չկա, երբ կառավարությունը, քաղաքացիական հասարակությունը և երկրի բոլոր բնակիչները գտնվում են միմյանց միջև կենդանի երկխոսության մեջ: Դրանք տեղի են ունենում միայն այն ժամանակ, երբ դիտվում է լարվածություն և մեկուսացում»,- ասել է նա:

Վիկտորյա Նուլանդը նաև հավելել է, որ Ալիևի հետ պայմանավորվել են ինտենսիվ դարձնել կոռուպցիայի դեմ պայքարում համագործակցությունը, որը նա անվանել է «Ժողովրդավարությունը սպանող»: