Ճապոնիայում կստուգեն «Ֆուկուսիմա-1» ատոմակայանի 20 հազար աշխատողի առողջական վիճակը

Ճապոնիայի «Ֆուկուսիմա-1» վթարային ատոմակայանում 2011 թվականի մարտից մինչև դեկտեմբերն ընկած ժամանակաշրջանում՝ կայանի հիմնական ճգնաժամի ընթացքում, աշխատած շուրջ 20 հազար մարդ կանցնի առողջական վիճակի հետազոտություն: Այս մասին, ինչպես տեղեկացնում է «Արմենպրես»-ը, մարտի 4-ին հայտնել է Ճառագայթումային հիվանդությունների հետազոտությունների կենտրոնը:

Նշվում է, որ հետազոտությունները կսկսվեն արդեն այս տարի, և դրանց գլխավոր խնդիրը կդառնա ճառագայթման հարուցած հնարավոր հիվանդությունների հայտնաբերումը: Ցուցակում առաջինը կլինեն անմիջականորեն Ֆուկուսիմայի պրեֆեկտուրայի այն բնակիչները, որոնք այդ ժամանակ աշխատել են կայանում: Առողջական վիճակի ստուգումը կամավոր է:

ՏԱՍՍ-ը հիշեցնում է, որ 2011 թվականի մարտի 11-ին «Ֆուկուսիմա-1» ատոմակայանում տեղի ունեցած վթարի հետևանքով ընդարձակ տարածքներ ենթարկվել են ճառագայթաակտիվ նյութերով աղտոտման, հիմնականում Ֆուկուսիմայի պրեֆեկտուրայում: Ատոմակայանի շրջանից ստիպված են եղել տարհանել ավելի քան 80 հազար մարդու: