Իրանի միջուկային ծրագրի շուրջ բանակցող կողմերը մոտ են համաձայնագրի կնքմանը. Զարիֆ

Իրանը և միջազգային միջնորդների «վեցյակը» մոտ են իրանական միջուկային ծրագրի վերաբերյալ համաձայնության հասնելուն: Այդ մասին, ինչպես տեղեկացնում է «Արմենպրես»-ը, Իրանի արտաքին գործերի նախարար Մոհամադ Ջավադ Զարիֆը հայտարարել է NBC հեռուստաալիքին տված հարցազրույցում:

«Մենք պատրաստ ենք շուրջօրյա աշխատել, որպեսզի գանք համաձայնության: Մենք հավատում ենք, որ շատ մոտ ենք դրան, շատ մոտ, բայց միևնույն ժամանակ կարող ենք և շատ հեռու լինել»,- ասել է Զարիֆը՝ հավելելով, որ առայժմ կան մի շարք հարցեր, որոնց լուծման վրա դեռ պետք է աշխատել:

Նա հայտարարել է, որ երկրի միջուկային ներուժը միշտ էլ ուղղված է եղել միայն այդ բնագավառում գիտական առաջընթացի հասնելուն: «Հենց որ մյուս երկրները հասկանան և ընդունեն այդ փաստը, իրանական միջուկային ծրագրի շուրջ համաձայնությունը ձեռք կբերվի, և այն շահավետ կլինի բոլորին»,- հավելել է Զարիֆը:

«Վեցյակը» և Իրանը շարունակում են դիվանագիտական ջանքերը Թեհրանի միջուկային ծրագրի շուրջ մինչև մարտի 24-քաղաքական համաձայնագրի, իսկ մինչև հունիսի վերջը համապարփակ համաձայնագրի մշակման ճանապարհին:

Ավելի վաղ հաղորդվել է, որ Իրանի միջուկային ծրագրի շուրջ այդ երկրի և ԱՄՆ-ի երկկողմ բանակցությունների հաջորդ փուլը կկայանա մարտի 15-ին: Հանդիպման վայրը դեռ որոշված չէ, բայց, ամենայն հավանականությամբ, կողմերը կհանդիպեն Ժնևում:

Մարտի 4-ին ԱՄՆ-ի պետքարտուղար Ջոն Քերին և Իրանի արտաքին գործերի նախարար Մոհամադ Ջավադ Զարիֆն ավարտել են բանակցությունները շվեյցարական Մոնտրյոյում: Հանդիպումը, ինչպես նշում է ՌԻԱ Նովոստին, նախորդել է «վեցյակի» (ՄԱԿ-ի Անվտանգության խորհրդի հինգ մշտական անդամները և Գերմանիան) և Իրանի քաղաքական տնօրենների մակարդակով բանակցություններին, որոնք նշանակված են մարտի 5-ին: