Հովհաննես Սահակյանը Եվրանեսթ ԽՎ հանձնաժողովի նիստում խոսեց սահմանադրական բարեփոխումների մասին

Հայաստանի ներքաղաքական կյանքում շատ կարևոր դեր կարող են ունենալ սահմանադրական բարեփոխումները: Եվրանեսթ ԽՎ քաղաքական, մարդու իրավունքների և ժողովրդավարության հարցերի մշտական հանձնաժողովի նիստում նման կարծիք հայտնեց ԱԺ ՀՀԿ խմբակցության պատգամավոր Հովհաննես Սահակյանը: «Սահմանադրական բարեփոխումներն իրենցից ենթադրում են համակարգային փոփոխություններ: Իսկ այդ համակարգային բարեփոխումները սահմանադրական փոփոխությունների տեսքով նախաձեռնել է մեր երկրի Նախագահ Սերժ Սարգսյանը»,- «Արմենպրես»-ի հաղորդմամբ՝ նշեց Սահակյանը:

Պատգամավորը նկատեց, որ քաղաքական ուժերի հետ ՀՀ Նախագահի հանդիպումները ցույց տվեցին, որ ՀՀ իշխանություններն իսկապես ցանկանում են իրականացնել ժողովրդավարական արմատական փոփոխություններ և երկիրը տանել զարգացման ճանապարհով:

Հայաստանի Հանրապետության Նախագահ Սերժ Սարգսյանը մարտի 14-ին հավանություն է տվել ՀՀ Նախագահին առընթեր սահմանադրական բարեփոխումների մասնագիտական հանձնաժողովի կողմից Հայաստանի Հանրապետության Նախագահին ներկայացված սահմանադրական բարեփոխումների հայեցակարգին: Հանրապետության Նախագահի որոշման համաձայն՝ ՀՀ Նախագահին առընթեր սահմանադրական բարեփոխումների մասնագիտական հանձնաժողովը քաղաքական կուսակցությունների հետ կկազմակերպի և կիրականացնի քննարկումներ սահմանադրական բարեփոխումների հայեցակարգում ամրագրված մոտեցումների կենսագործման վերաբերյալ և կամփոփի կուսակցությունների ներկայացրած առաջարկություններն ու դիտողությունները: