Հայ ժողովուրդը վերածնվեց և նոր կյանք մուտք գործեց որպես քաղաքակիրթ ժողովուրդ. Հասմիկ Պողոսյան

Հայոց ցեղասպանությունից հետո հայ ժողովրդի վերածնունդը նման չէր այն ընդունված հասկացությանը, որը եղել է հայ և համաշխարհային պատմության մեջ: Հայ ժողովրդի և մշակույթի փրկությունը վերածննդի նոր հասկացություն և իմաստ բերեց: Գնահատականը ՀՀ մշակույթի նախարար Հասմիկ Պողոսյանինն է: «Արմենպրես»-ի փոխանցմամբ, «Արարատի ստորոտին» միջազգային մեդիաֆորումի ժամանակ Պողոսյանն ասաց, որ հայ ժողովրդի համար վերածնունդը տեղի ունեցավ հայկական քաղաքակրթության բնաջնջման փորձից հետո:

«Ես համաձայն չեմ այն տեսակետի հետ, որ Հայոց ցեղասպանության ընթացքում մարդկային ցեղասպանությունը մշակութային ցեղասպանությանը զուգահեռ ընթացավ: Ո՛չ: Մշակութային ցեղասպանությունն ավելի վաղ է տեղի ունեցել: Անիի ավերակները, Ուրֆայի ճարտարապետական կոթողները և այլ ավերված մշակութային արժեքները դրա վառ ապացույցն են: Մշակութային ցեղասպանությունը կիրառվում է նաև այսօր Սիրիայում, Իրաքում: Այն բերում է նոր ավելի սարսափելի երևույթների, քանի որ ժամանակին չդատապարտվեց»,- ասաց Հասմիկ Պողոսյանը՝ հավելելով, որ թուրքերը սխալվել էին' կարծելով, թե ոչնչացնելով հայկական մշակութային արժեքները, ցեղասպանության ենթարկելով և տեղահանելով հայ ժողովրդին, կկարողանան ստիպել աշխարհին մոռանալ հայի և Հայաստանի մասին:

«Նրանք սխալվեցին, քանի որ Ցեղասպանության ականատեսներն ու փրկվածները փրկեցին նաև Հին և Նոր կտակարանները, Մշո ճառընտիրը, հարյուրավոր մագաղաթներ, որոնց շնորհիվ հայ ժողովուրդը վերածնվեց և նոր կյանք մուտք գործեց ոչ թե որպես քոչվոր, այլ որպես քաղաքակիրթ ժողովուրդ»,- ասաց Հասմիկ Պողոսյանը՝ հավելելով, որ վերածնված հայը կարողացավ համաշխարհային մշակույթի գործեր ստեղծել: